باسکتبول

باسكێتا دهۆكێ كه‌مپێ خۆ ل توركیا بدوماهی ئینا

پشتى بۆ ماوه‌یێ زێده‌تر ژ حه‌فتیه‌كێ تیما باسكتبۆلا یانه‌یا دهۆكێ كه‌مپه‌كێ راهێنانێ ل باژێرێ ئسته‌نبۆل یێ توركی داناى ، ب مه‌ره‌ما خۆ به‌رهه‌ڤكرنێ بۆ وه‌رزێ نوو یێ خولا ئیراقێ یا باسكتۆلێ بۆ یانه‌یێن پلا نایاب، دڤى كه‌مپێ راهێنانێدا رۆژانه‌ دو یه‌كه‌یێن راهێنانێ و هه‌تا نوكه‌ چار یاریێن هه‌ڤالینی ئه‌نجامداین ئه‌وژی دگه‌ل یانه‌یێن چوب(d.s.i)، ئیشیلبۆرت سه‌ركه‌ڤتن ئیناین ب(85-65) خالان و(83-59) خالان دیسان دگه‌ل یانه‌یا ئاچی پایدم یۆنیڤێرستی(84-61) خالان، بۆ زانین هه‌رسێ تیمێن دخولا پلا دوو یا توركی یاریێ دكه‌ن، هه‌روه‌سان بهێزترین یاری دوهی دگه‌ل هه‌لبژارتیێ ئیماراتێ كربوو و سوبه‌هی دوماهی بكه‌مپێ خۆ بینیت و بزڤڕیته‌ كوردستانێ، لدۆر ڤی كه‌مپی و چه‌ند مفا ژێ وه‌رگرتییه‌، رۆژنامه‌یا وار بۆچوونێن جودا وه‌رگرتینه‌ ئه‌وێن بڤی ره‌نگی بوو خوانده‌ڤانان دیاردكه‌ن.لده‌ستپێكێ سامر مسته‌فا راهێنه‌رێ تیمێ گۆت، لدووڤ نه‌خشه‌یێ مه‌ بوو كه‌مپێ راهێنانێ دانایی ئه‌م شیاین تا راده‌یه‌كێ باش مفایی ژێ وه‌ربگرین، بتایبه‌تی پشتى هاتنا یاریكه‌رێن پیشه‌كار، هه‌رچه‌نده‌ گۆنجاندنا وان دگه‌ل تیمێ ده‌مه‌كێ زێده‌تر دڤێت، ئه‌ڤه‌ژی دێ د راهێنانێن مه‌ ل یانه‌یێ و یاریێن خولێدا به‌ره‌ڤ باشتر بیت، رۆژانه‌ دو یه‌كه‌یێن راهێنانێ دهاتنه‌كرن، دیسان مه‌ چوار یاریێن هه‌ڤالینی ئه‌نجامداینه‌ پێنه‌ڤێت یا گرنگ بوو مه‌ ئه‌وبوو ئه‌م نێزیكبوونه‌كێ و كه‌شێ كه‌مپێ لسه‌ر یاریكه‌ران بدانین نه‌ك ئه‌نجامێ ڤان یارییان، ئه‌ز لسه‌ر ئاستێ یاریكه‌ران ب گشتى و یێن پیشه‌كاران رازیمه‌، ئه‌م لسه‌ر خه‌له‌تیێن وان راوه‌ستیان و د راهێنانادا ڕێ بوو چاره‌سه‌رییا ڤان خه‌له‌تیان كرییه‌، مه‌ره‌ما مه‌ یا سه‌ره‌كی ئه‌وه‌ ئه‌م ژ وه‌رزێ بۆری بهێزتربین و هه‌موو شیانێن خۆ بمه‌زێخین ژبوو پاراستنا ناسناڤێ خۆ یێ وه‌رزێ بووری و ئه‌ڤه‌ژی ئارمانجامه‌یه‌. ژلایێ خۆڤه‌ قوته‌یبه‌ عه‌بدوللا كاپتنێ تیمێ په‌سنا كه‌مپێ راهێنانێ كر و گۆت، پێخۆشحالین د ماوه‌یێ كه‌مپێ دا لدووڤ پلان و نه‌خشه‌یێن كادرێ راهێنانێ ئه‌م شیاین مفایی ژ كه‌مپێ خۆ وه‌ربگرین، هه‌موو یاریكه‌ران ب تیمه‌كا كۆم و پێگیری ب به‌رنامه‌یێ كه‌مپێ هه‌بوو كو ئه‌ڤه‌ بوو نیشانا سه‌ركه‌ڤتنا كه‌مپێ مه‌، هاتنا یاریكه‌رێن پیشه‌كار هێزه‌ك دا تیمێ، تێگكه‌هشتنه‌كا باش دناڤبه‌را مه‌ هه‌موو یاریكه‌ران دا په‌یدابوویه‌، گه‌شبینم دێ ب روویه‌كێ بهێزتر هێنه‌ دناڤ خولێ دا، ئه‌م قاره‌مانێن وه‌رزێ بۆری نه‌ و دێ بزاڤێ كه‌ین بۆ وه‌رزێ ئه‌ڤ ساله‌ پاراستنا ڤی ده‌ستكه‌ڤتی كه‌ین. ژلایێ خۆڤه‌ تۆنی واتسۆن پیشه‌كارێ ئه‌مریكی كه‌یفخۆشییا خۆ دیاركر كو ئه‌ڤه‌ دبیته‌ پێنگاڤا وی یا ئێكێ دگه‌ل یانه‌یا دهۆكێ و گۆت، هه‌رچه‌نده‌ بڕێیا هه‌ڤالێن خۆ من پێزانین لسه‌ر یانه‌یا دهۆكێ هه‌بوون، به‌لێ دیاره‌ خودان ده‌ستكه‌ڤته‌ و سه‌نگا خۆ دناڤ قاره‌مانیێن ئاسیا دا هه‌یه‌، لرۆژا ئێكێ یا راهێنانان بوو من یا بزه‌حمه‌ت بوو به‌لێ هه‌رزوو نێزیكبوونه‌ك په‌یدابوو ژبه‌ركۆ تێگكه‌هشتن دناڤبه‌را یاریكه‌ران گه‌له‌ك یا بهێزبوو و د هاریكاربوون دگه‌ل مه‌، بدیتنا من كه‌مپه‌كێ سه‌ركه‌ڤتی بوو، یاریێن مه‌ كری د ئاسته‌كێ بلند دا بوون، ئه‌ز كه‌یفخۆشم بهێمه‌ دهۆكێ و ببمه‌ جهێ رازیبوونا جه‌ماوه‌ری و هندی من شیان هه‌بن دێ بۆ سه‌ركه‌ڤتنا تیمێ ته‌رخانكه‌م، ئه‌ز چاڤه‌ڕێی خولا ئیراقێ مه‌ و تیما مه‌ یا بهێزه‌. لدووماهیێ سه‌رۆكێ یانه‌یا دهۆك و سه‌رۆك شاندێ تیمێ گۆت، پێنه‌ڤێت مه‌ره‌ما سه‌ره‌كی یا ڤێ كه‌مپێ به‌رهه‌ڤكرنا تیمێیه‌ ب لایه‌نێ هێزێ و شیانان و ده‌رۆنی ژبۆ هندێ به‌ری بكه‌ڤیته‌ د خولا ئیراقێ دا یا به‌رهه‌ڤبیت، تیما دهۆكێ قاره‌مانا وه‌رزێ بۆرییه‌، سه‌نگا خۆ یا هه‌ی د خولێ دا، له‌ورا بزاڤێن مه‌ دخۆرتن ژبۆ مانا سه‌نگا تیمێ د خولێ دا، بدیتنا من لدووڤ ره‌وشا تیم تێدا كه‌مپه‌كێ سه‌ركه‌ڤتی بوو، ژ هه‌موو لایه‌نانڤه‌ لایه‌نێ ڕێكخستنێ و ئۆتێلێ و جهێ راهێنانان و یارییان، وه‌كو كارگێرییا یانه‌یێ یا پێدڤی بۆ سه‌ركه‌ڤتنا تیمێ ئه‌نجامدایه‌، وه‌كو دیار گه‌شبینی یا دناڤ رێزێن تیمێ دا ئه‌ڤه‌ژی باشترین پالده‌ره‌ ئه‌م هزر د پاراستنا ناسناڤێ خۆ بكه‌ین، هه‌رسێ پیشه‌كارێن ئه‌مریكی د ئاسته‌كێ باش دانه‌ و دێ مفایه‌كێ باش و ئه‌كتیڤ ژێ وه‌رگرین، ژبه‌ركو پێدڤی ب ده‌مه‌كێ كورت هه‌نه‌ ئه‌و بكه‌ڤنه‌ لسه‌ر شێوازێ خولا ئیراقێ، هه‌رچه‌نده‌ د كه‌مپێ دا یێن دیاربوون كو ئاسته‌كێ باش و مه‌زن هه‌نه‌، ب هیڤییا وێ چه‌ندێ هه‌مان ئاست ئه‌م د خولا ئیراقێ ژی دا بینین.

تاگس
زێدەتر ببینە
Back to top button
Close