بۆچوون

نڤیسەرەکێ ناڤدارێ تورکیا پیلانێن ئەردۆگانی ئاشکرا دکەت

نڤیسەرەکێ ناڤدارێ تورکیا دیار دکەت کو ئێک ژ ئەگەرێن سەرەکی یێن دوژمناتیا ئەردۆگانی ل گەل کوردان بۆ رێککەفتنا ل گەل پارتیا نەتەوەپەرست ڤەدگەریت و خالا دی ئەردۆگان دێ ھەتا ناڤەراستا سالا ٢٠١٩ گەلەک گوھۆرینان د ناڤا پارتیا خوە و حوکمەتێ دا کەت و دێ ھەموو بزاڤەکێ کەت دا بارێ ئابووریێ یێ تورکیا باش بکەت، ئانکۆ دێ ئەردۆگان دیسان گەلەک ھەڤالێن خوە کەتە قوربانی.

عەبدولقادر سەلڤی نڤیسەرێ ناڤدارێ تورکیا و کەسەکێ نێزیکی حوکمەتێ دوھی د بابەتەکا خوە دا کو ل رۆژناما حوڕیەت یا تورکیا بەلاڤ بوویە ئاماژە ب پیلانێن نوو یێ سەرۆک کۆمارێ تورکیا رەجەب تەیب ئەردۆگانی دکەت بۆ مانا ل سەر دەستھەلاتێ و دیار دکەت کو ئەردۆگان بەری نھا گەلەک پێنگاڤ بۆ چارەکرنا پرسا کوردی ھاڤێتن، لێ نھا ئەردۆگان ل تورکیا پتر ژ ھەر کەسەکێ دژبەریا مافێ کوردان دکەت و ناخوازیت کوردان چو کیانەک ل رۆژھەلاتا ناڤین ھەبیت، یا ئێکێ ئەردۆگان دزانیت کو ئێدی نەشێت وەکو بەرێ دەنگێ کوردان بدەستڤە بینیت و ژ بەر ھندێ ژی بەری نھا ھەر زوو ل گەل پارتیا بزاڤا نەتەوەپەرست ھەڤپەیمانی دروست کر، ئارمانجا سەرەکی یا ئەردۆگانی ئەڤە کو جارەکا دی ئانکۆ د ھەلبژارتنێن سالا ٢٠١٩ یێ سەرۆک کۆماریێ دا بشێت جارەکا دی ببیتە سەرۆکێ تورکیا.

نڤیسەرێ ناڤدارێ تورکیا دیار دکەت کو گەلەک کەس د ناڤا حوکمەتێ و ئاکپارتیێ دا ل دژی بەرنامێن ئەردۆگانی نە، ب تایبەتی ژی ل دژی ھەڤپەیمانیا ل گەل پارتیا بزاڤا نەتەوەپەرستن ژ بەر ھندێ ژی ئەردۆگان بەری ھەلبژارتنان دێ دەست ب گوھۆرینێن مەزن و بنگەھین د ناڤا پارتیا خوە دا بکەت و ئەردۆگان دێ کابینا نھا یا حوکمەتێ ژی گوھۆریت و دخوازیت کەسێن نوو بکەتە خوەدان بریار دا ئەو ب تەمامی گوھداریا وی بکەن، ھەر وەکو چاوا بەری نھا ژی ئەردۆگانی بۆ مەرەمێن خوە یێن سیاسی گەلەک ھەڤالێن خوە یێن وەکو بولەنت ئارنج، عەبدوللا گول و داوود ئوگلۆ کرنە قوربانی دێ نھا ژی گەلەک کەسێن دی ببنە قوربانی، ئارمانجا سەرەکی یا ئەردۆگانی ئەڤە کو کەسێن دژبەریا وی دکەن ل سەر دەستھەلاتێ نەمینن.

عەبدولقادر سەلڤی د بەردەوامیا نڤیسا خوە دا ئاماژە ب ھندێ ژی دکەت کو ئەردۆگان دێ ل سەر خالەکا دی یا گرنگ کار بکەت، ئەڤ ژی باشکرنا بارێ ئابووری یێ تورکیا یە. نھا رەوشا ئابووری یا تورکیا خرابە و راپرسیێن نھا دھێنە کرن ژی نیشا ددەن کو خەلک وەکو جاران پشتەڤانیێ ل ئەردۆگانی ناکەن، ژ بەر ھندێ ژی بەری ھەلبژارتنان دێ ئەردۆگان بزاڤێ کەت ب رێیا ھندەک پرۆژێن ئابووری یێن باش رەوشا خەلکی و وەلاتی باش بکەت دا بشێت پشتەڤانیا خەلکی بدەستڤە بینیت، ژ بەر ھندێ ژی پێدڤیە گوھۆرینان د ناڤا پارتیا خوە و کابینا حوکمەتێ دا بکەت.

ناڤھاتی ئاماژە ب ھندێ ژی دکەت کو ھەتا ھەلبژارتنان دێ ئۆپەراسیۆنێن تورکیا ل دژی پەکەکێ ل باشور و رۆژئاڤایێ کوردستانێ بەردەوام بن، چونکو ھەتا ئۆپەراسیۆن بەردەوام بن دێ نەتەوەپەرستێن تورک پشتەڤانیێ ل ئەردۆگانی بکەن و خالا دی یا گرنگ دەولەت باخچەلی سەرۆکێ پارتیا بزاڤا نەتەوەپەرست ژی ژ بەر شەری و بەردەوامیا ئۆپەراسیۆنان بەرھەڤە پشتەڤانیێ ل ئەردۆگانی بکەت، بەرنامێ ئەردۆگانی ب تەمامی تورکیا بەر ب شەرەکی نوو ڤە دبەت و تورکیا نھا ژ چارەسەریا پرسا کوردی و گەلەک پرسێن دی دوور کەفتیە، ھەکە ئەردۆگان پشتی سالا ٢٠١٩ ژی بزاڤا چارەکرنا پرسا کوردی بکەت یێ سەرکەفتی نابیت چونکو ئێدی باوەریا کوردێن تورکیا ب ئەردۆگانی و پارتیا وی نەمایە.

زێدەتر ببینە

پوستێن ھەمان بەشی

بەرچاڤکرنا پوستێن گرنگ

Close
Back to top button
Close