ئالیێن سیاسی ل سه‌ر مانا حكومه‌تا عه‌بدولمه‌هدی رێككه‌فتینه
ئالیێن سیاسی یێن ئیراقی ل سه‌ر مانا حكومه‌تا عادل عه‌بدولمه‌هدی رێككه‌فتینه و ئه‌گه‌ر پێدڤی كر هێز ژ بۆ ب داویئینانا خوه‌نیشاندانان بهێت بكارئینان.
ئالیێن سیاسی یێن ئیراقی د كۆمبوونه‌كێ دا كو ل ئاستێ سه‌ركرده‌یان بوو، رێككه‌فتن كرینه حكومه‌تا نها یا ئیراقێ ب سه‌رۆكاتییا عادل عه‌بدولمه‌هدی بمینیت و ئه‌گه‌ر پێدڤی كر ژ بۆ مانا ڤێ حكومه‌تێ هێز بۆ ب داویئینانا خوه‌نیشاندانان بهێت بكارئینان.
د ڤێ ده‌ربارێ دا ئاژانسا فرانس پرێس ژ زارێ دو به‌رپرسێن ئیراقێ ڤه‌گوهاستیه، ئالیێن سیاسی یێن ئیراقی رێككه‌فتن كرینه كو چاكسازی بهێنه كرن و ئه‌و یه‌ك ب مه‌رجێ مانا عادل عه‌بدولمه‌هدی و حكومه‌تا وی داناینه.
دگه‌ل دژواربوونا خوه‌نیشاندانێن ئیراقێ، داخوازا هه‌لوه‌شاندنا حكومه‌تا فیدرال یه‌ك ژ داخوازیێن سه‌ره‌كی یێن جاده‌یا ئیراقی یه، ل حه‌فتییا بۆری هه‌رسێ سه‌رۆكاتیێن ئیراقێ كۆمببوون و د. به‌رهه‌م سالح سه‌رۆك كۆمارێ ئیراقێ راگه‌هاندبوو؛ عه‌بدولمه‌هدی رازیبوویه ده‌ست ژ كار بكێشیت ب مه‌رجه‌كی وه‌لات نه‌كه‌ڤیته د ڤالاتیا ده‌ستووری دا.
