ئەمریکا کوشتنا خوەنیشاندەران ل ئیراقێ شەرمزار کر

بالیۆزخانەیا ئەمریکا ل بەغدا ئەڤرۆ راگەهاند، جێگرێ وەزیرێ بەرگرییا ئەمریکا چەندین کۆمبوونێن گرنگ ل هەرێما کوردستانێ و ئیراقێ کرینە و کوشتن و رەڤاندنا خوەنیشاندەران شەرمزار کرییە.
بالیۆزخانەیا ئەمریکا ل ئیراقێ ئەڤرۆ راگەهاند، جۆن رۆد، جێگرێ وەزیرێ بەرگرییا ئەمریکا ل 24 و 25ی ڤێ مەهێ سەرەدانا هەرێما کوردستانێ و ئیراقێ کرییە و ل هەولێرێ دگەل مەسروور بارزانی، سەرۆکێ جڤاتا وەزیرێن هەرێما کوردستانێ و جێگرێ وی قوباد تالەبانی کۆم بوویە و بەردەوامییا پەیوەندی و هەماهەنگییا ئەمریکا و کوردستانێ ب گرنگ ناڤ کرییە.
بالیۆزخانەیا ئەمریکا هەروەسا دیار کرییە، جۆن رۆد ل بەغدا ژی دگەل عادل عەبدولمەهدی، سەرۆکوەزیرێ ئیراقێ و نەجاح شومەری، وەزیرێ بەرگرییا ئیراقێ کۆم بوویە و داخواز ژێ کرییە، خوەنیشاندەر نەهێنە کوشتن و رەڤاندن و ئازادیا رادەربرینێ و خوەنیشاندانێن ئاشتیانە بهێنە پاراستن.