پشتی (موچا)………..؟!!
تێرا ھندێ گەشبینی ھەیە، کو پرسا موچا ب چی قەبارێ ھەیی چارەسەر بیت و جارەکا دی ھەمی سەرێ ھەیڤی موچە بێن دابەشکرن. لێ ھزار پرسیار دروست دبن، پشتی موچا ئایا دێ پرسێن مەیێن ژیانەڤانی چارەسەر بن یان دێ لسەر ئاستێ مالێ ئەم راستی کارەساتا ب لێشاوا خەرجیێن تامسار دبین؟!
نزا ئابوریناسێن مە چما ژ کەرەما خوە ئاموژگاریا لمە ناکن، بچی تەرزی پارا ب مەزێخین و ھونەرێ ژیانێ ل باژێران چیە؟ بەرگریا مرۆڤی نوکە بوویە ئارمانجا (ریکلامێ) چەوا دێ یا خور بیت. دێ بچی رەنگی ئەڤ تالانکرنا(بەریکا) ھێتە کێم کرن؟ خوە راگرتن بەرامبەری ڤێ ریكلاما کەرستەداریا بێ سنور، مروڤێ ڤی سەردەمی راستی قەیرانا پالسەنگیێ بوی، دناڤبەرا (داھات و خەرجی)یاندا. کەسێ شیانێن دابینکرنا فاتورا ھەمی ژیانێ نەمایە، کەسێ تاقەتا ھندێ نینە پێرا بگەھیت دەرحەق لیستا داخازیێن ڤی سەردەمی پر کەتن.
بێگومان ئەڤە پرسا کوردستانێ بتنێ نینە، ئەڤ پرسە ل ئابوریێن ھەرە سەرکەفتی ژی سەرھلدایە. ھیج سەردەمەکێ ھندی ڤی سەردەمی کەرەستە دروست و بەردەست نەبوینە. ھیج متایەک ژی بۆ سیکێ ناھێتە بەربازار کرن، ھەتا (کەسی) ل گور شیان و عەمری نەکەنە ئارمانجا ریكلامەک خاپینوک و بریسقەدار و پاشی تالانکرنا بەریکا کەسی و ھەمی تەعبا وی.
ئەم فەقیرێن(پێتڤێن سەرەکی) نینین، ھندی ئەم ھەژارێن کەرستێن نە پێتڤی! ھەمی مروڤایەتی یا راستی ڤێ گێژەڤانکێ بووی. ئەم تازە ژیانێ ل باژێران دکین و نەبویە ٥٠ سال ئەم د باژێران دا بژین و ھێشتا مە (دوو بەرەباب) نینن ل زانکویا دەرچوو بن. ب کلتورێ گوندی و ب ھەمی شانازیێن گوندیاتیێ ڤە رادھێلین پرکرنا ھەمی کێماسێن مە بخوە بۆخوە درست کرین و ب کورتی دبیت بەغدا ژی ڤێ بزانیت، ئەم چەند پێدڤی پارەینە و پێدڤییا مە نە ژبەركو دابژین، بەلکو دا خو پێ ب خەملینین!!
لڤێرێ سیاسەت ژی تێکەلی ڤێ ئالوزیێ دبیت، مسوگەر دێ موچە درست بن، ئەڤە ئەرکێ حکومەتێ یە بکەتن. لێ ئەم وەک تاک راھاتی نە چەوا موچا بخوین، چی گرنگە و چی نە گرنگە؟ ئەگەر راست بیت ل سەر بەختێ ھندەک ژێدەرا دبێژن، قەبارێ (عەمەلیات جمیل) ل کوردستانێ بۆ نێزیکی دوو سالا (ملیار دولارە)؟! دبێژن سیکا تەلەفونا ل کوردستانێ (٣) ملیار دولارە؟! و یێن دی دبیت نەھێن گوتن.
ئەرێ ئابوریناسێن مە چی خاندن بۆڤێ پرسا نوی ھەیە؟ ئەرێ ئەم دشێین ڤێرا بگەھین ھەمی وان کێماسیا پرکەین یێن ریكلام بۆ مە درست دکەتن!؟ یان ژی زڤرین نینە و دڤیا لڤی شێوەی رابھێین و بژین وەک سیک سەرمایەداریا روت دخازیت. ئەرێ موچە دێ ڤێ ڤالاھیا ھەمی پرکەن یان (ھل من مزید) دێ دڤێ گێژەڤانکێ دابین.
