کوردســــــــتان و عێراق و فوتبۆڵ …
پەیوەندیێن حکومەتا ھەرێما کوردستانێ و حکومەتا عێراقێ ژ سالا ٢٠١٤ و ھێرڤە رۆژ بۆ رۆژێ بەر ب لاوازبوونێڤە دچن .کار گەھشتیە ھندێ کو پیڤانا سەرکەفتنا ھەر ئالییەکێ عەرەبی ب شیعە و سوننی ڤە دژایەتیا زێدەتر و ھونەریترە لھەمبەر کوردستانێ . نھۆ بوویە بەریکانێ کا کی دێ داھینانەکا باشتر کەت بۆ لێدانا کوردستانێ .کەس گوھێ خۆ نادەتە ھندێ ئایا ئەڤ دژایەتیە دەستوری و یاساییە یان ژی ھەما ژێھاتنە .تا نھۆ پێنجی و دوو بەندێن دەستورێ عێراقێ نەھاتینە جێبەجێکرن و نەلبەرە ژی کو جێبەجی بکەن .ئەڤ شاندێن مە یێن کو دچنە بەغدا تنێ وەختێ خۆ دگرن و داویا وێ تشتەک ژێ شین نابیت . بابەتێ دۆرپێچا ئابوری لسەر ھەرێما کوردستانێ بۆ ھندێ یە کو ژ لایەکیڤە گەلێ کوردستانێ ھند برسی بکەن کو ئێدی دەست ژ ھەموو ماف و داخوازیێن نەتەوەیی و سیاسی بەردەن و تنێ ھاوارا برسیبوون و مووچەی بکەن و ژ لاکێ دیڤە دەنگێ شەقامێ عەرەبی بدەستڤە بینن . تشتەکێ دیار و زەلالە کو حکومەتا ھەرێما کوردستانێ ھەموو مەرجێن دەستوری و یاساییێن حکومەتا عێراقێ بجھ ئانینە . ئەگەر حکومەتا کوردستانێ ژ خۆ پشتڕاست نەبایە داخوازا چاڤدێریا نەتەوەیێن ھەڤگرتی و ئەمریکا نەدکر بۆ دانوستاندنێن دناڤبەرا خۆ و بەغدایێ دا .ئەڤە ژ بلی کو ب دانانا دۆرپێچا ئابۆری لسەر ھەرێمێ نەکو ب تنێ پەیوەندیێن حکومەتا کوردستانێ دگەل عێراقێ لاواز بووینە بەلکو پەیوەندیێن کوردستان و جڤاکا کوردستانێ ژ لایێ رەوانی و سیاسی و ئابوری ب گشتی دگەل عێراقێ گەھشتیە لاوازترین ئاستێ خۆ .ھەتا بەری ھەڕفاندنا رژێما بەعس، پەیوەندیێن ھەرێما کوردستانێ و خەلکێ کوردستانێ تنێ مابوو یاریێن تۆپانێ ل دەوریێن فوتبۆلا عێراقێ و جار و بار سەرەدانا خەلکێ نەساخ بۆ چارەسەریێ لجەم دختورێن بەغدا .نھۆ راستە ھندەک پەرلەمانتار و وەزیر ل بەغدایێ ماینە ، لێ بێ کاریگەری و رۆڵن . نەشێن ھیچ بڕیارەکا عەرەبان بگوھۆڕن و عەرەب ژی ھەڤڕکیا ھەڤدو دکەن بۆ لێدانا کوردستانێ .ھەرێما کوردستانێ نھۆ ژ لایێ پەیوەندیان ڤە گەھشتیە ھەر ئەو ئاستێ پەیووندیێن دگەل رژێما سەدامی . مە پێکڤە تنێ مایە ھاتن و چوونا تیمێن تۆپانێ . ئێدی خەلک بۆ چارەسەریێ ژی ناچیتە بەغدا …
