عێراقی و بودجەیا کوردستانێ . . .
د بنەڕەتدا ئەو عەرەبێن نھۆ ئەندامێن پەرلەمانێ عێراقێنە ، ھیچ باوەرییەک ب دیموکراسی و مافێ مرۆڤان و پەژراندنا ئەوێدی نینە . ب دیتنا من پێویست ناکەت ئێدی ھیچ شاندەک ژ ھەرێما کوردستانێ بچیتە بەغدایێ بۆ دانوستاندنێ لسەر پشکا ھەرێما کوردستانێ د یاسایا بودجەیا عێراقێ دا . عێراقیان بڕیار دایە لسەر ھیمێ کێمانی و پڕانی سەرەدەریێ دگەل ماف و بەرژەوەندیێن کوردستانیان بکەن . گەلەک گرنگ ژی نینە کو پشکا کوردستانێ د بودجەی دا بھێتە چەسپاندن یان نە و ئەگەر ببیت ژی ئەو پشک ژ سەدێ چەند بیت …!چنکو ئەو حکومەت و پەرلەمانیێن کو ھەتا نھۆ پێنجی و پێنج بەندێن دەستورێ خۆ جێبەجی نەکرین ، گەلەک ب ساناھی دکارن ڤێ ژی جێبەجی نەکەن . ھەر وەسا گەلەک ساناھییە ئەگەر پشکا کوردستانێ د یاسایا بودجەی دا بھێتە دیار کرن ژی ، ئەو دکارن نەھنێرن وەکو چاوا ل ساڵێن بوریدا سەرەڕای کو پشکا مە دھاتە دیار کرن ژی ، لێ وان ( عەرەبان ) ب ساناھی میزانیە راگرتن و نەھنارتن .کێشە ئەو نینە کو مە داھاتێن فرۆشتنا نەفتێ و دەریێن سنوری داینە عێراقێ یان نە . بەلکو وان ھەر ژ بنیڕا باوەری ب فیدڕالی بوونا عێراقێ و ھەبوونا مە کوردستانیان نینە .ئەڤە ژ 2005 تا نھۆ وان فلسەک و فیشەکەک بۆ ھێزا پێشمەرگەی نەھنارتیە و ناھنێرن . خۆ ل وی دەمی ژی مە کێشەیا نەفت و داھاتێ نەبوویە .لەورا باشترە حکومەتا کوردستانێ ئێدی ھیچ شاندەکی نەھنێریت و لسەر چاکسازیێن ناڤخۆیی بەردەوام بیت . چنکو تەنانەت ئەگەر ب ھەر ئەگەرەکێ وان بودجە ژی چەسپاند ، ئەو دێ ھێجەتەکێ ڤەبینن بۆ نەھنارتنا پشکا مە .
