ھەڵبژاردن و سیناریویێن کۆمکرنا دەنگان …
ھەر ئێک ژ ئەندامێن پەرلەمانێ عێراقێ شازدە پارێزڤان ( حیمایە )ھەنە . مووچەیێ وان ژی گەلەک زێدەیە . مخابن ھندەک یان ژی پڕانیا ڤان ئەندام پەرلەمانان دگەل شازدە کەسێن نێزیکی خۆ رێککەفتینە و پشکەکا کێم ژ پارەی ددەنە وان و پڕانیا مووچەیێ پارێزڤانان بۆ خۆ ھەلدگرن .ئەڤەژی لھەمبەر ھندێ کو ئەو کەس نەھێنە دەوامێ . وەکی دی ژی خۆ وەسا نیشان ددەن کو گەلەک گەلێری و شکەستینە بۆ خەلکێ خۆ . پێویست بوو پەرلەمانتاران پشکەک ژ مووچەیێ خۆ دابانە شیرەتکارەکی یان دوان داکو بۆ وان لێکۆلین و راپۆرتان بەرھەڤ بکەن . ڤێ چەندێ ژی ناکەن و کێمترین راپۆرتێن ئەرێنی ددەنە پەرلەمانی .مخابن گەندەڵی ھەتا مەژیێ ھەستیان چوویە ناڤ جڤاک و مۆڤکێن وێ .ئەو ئەندام پەرلەمانێن زێدەتر بەحسێ شەفافیەت و دژایەتیا گەندەلیێ دکەن ب خۆ گەندەلن و ژ وان بھێت ناھێلن چاکسازی ژی بھێتە کرن .دکتور غالبێ ئەندام پەرلەمانێ دژی ھەرێما کوردستانێ ، دبێژیت : ئەڤرۆ کەسەکی ل سلێمانیێ لبەر دەرگەھێ مالا وی ب کێرکێ ھێڕش کرییە سەر وی . ئەگەر ئەڤە راست بیت ؛ پێویستە ژ غالبی بپرسین کا پارێزڤانێن تە ؟!ئەم یێ نێزیکی ھەلبژاردنێن پەرلەمانێ عێراقێ دبین .ئێدی یاریێن ب ڤی رەنگی دێ مشە بن .ئەڤە سیناریویێن کۆمکرنا دەنگانە . زۆنا کەسک و نیلی ئەفڕێنەرێن سیناریۆ و پاڵەوان سازیێ نە.ئەز ھەتا سەر ھەستیان دژی توند و تیژی و لێدانێ مە . ھیڤیدارم ئەگەر راست بیت و کەسەکێ کێر ل دکتور غالبی دابن ، بھێتە گرتن و دادگەھ کرن و یێن پشت ڤێ لێدانێ بھێنە کفش و ریسوا کرن . بەلێ پا قەت ناکەڤیتە ئاقلێ من ئەڤە سیناریۆ نەبیت .
