سەرۆکێ جەھەپێ: ئاکپارتیێ دڤێت ھەموو کوردان سزا بدەت
کەمال کلچدار ئوگلۆ سەرۆکێ گشتی یێ پارتا کۆماریا گەل (جەھەپێ) راگەھاند کو دەستھەلاتا تورکیا دخوازیت ھەموو ئۆپۆزسیۆنێ ژناڤ ببەت و بۆ ڤێ چەندێ د ھەر وارێ ژیانێ دا زۆرداریێ دکەت و گۆت: (د ڤێ قۆناغێ دا ئەردۆگان ب جدی ھەست پێ دکەت کو دەستھەلاتا وی کەڤتیە مەترسیێ و بۆ ڤێ چەندێ زۆرداریێن ل سەر ئۆپۆزسیۆنێ دژوارتر دکەت و د ھەمان دەمی دا دخوازیت ھەەدپێ ل مەیدانا سیاسەتێ نەھێلیت و ب دارێ زۆرێ دەنگێ کوردان بۆ خوە کۆم بکەت، ھەدەپە نێزیکی حەفت ملیۆن دەنگێن ھەنە و دڤێت رێز ل ڤینا دەنگدەران بھێتە گرتن و داخستنا ھەدەپێ دھێتە واتەیا سزاکرنا نێزیکی حەفت ملیۆن دەنگدەرێن وێ و ئەو یەک ناھێتە قەبوول کرن).
ناڤھاتی ل دۆر بریارا دادگەھا مافێن مرۆڤی د دەربارێ ئازادکرنا سەلاحەدین دەمیرتاشێ ھەڤسەرۆکێ بەرێ یێ ھەدەپێ دا ژی راگەھاند کو تورکیا پەیمانا مافێن مرۆڤی ئیمزا کریە و دڤێت بێی مەرج بریارێن دادگەھێ بجە بینیت و د زووترین دەم دا سەلاحەدین دەمیرتاشی ئازاد بکەت.
کەمال کلچدار ئوگلۆ راگەھاند ژی کو وەلاتیێن کورد د ئاڤاکرنا ھەموو قۆناخێن تورکیا دا جە گرتینە و د شەرێ ئازادیا تورکیا دا پشکداری کرینە و دڤێت ل دووڤ ڤێ راستیێ ھەر کەس و ئالیەک نێزیکی کوردان ببیت و گۆت: (مخابن سەرۆک کۆمار ئەردۆگان ب تەمامی کەڤتیە ژێر کاریگەریا پارتا بزاڤا نەتەوەپەرست و ژ بەر ھندێ ژی گەلەک شاشیان دکەت).
