به‌شیر حه‌داد: ل دۆر بودجه‌ی شانده‌كێ هه‌رێمێ دێ سه‌ره‌دانا به‌غدا كه‌ت
شانده‌كێ وه‌زاره‌تا دارایی یا هه‌رێما كوردستانێ، بۆ بجهئینانا رێككه‌فتنا هه‌رێمێ و به‌غدا ودانانا میكانیزمه‌كێ بۆ وێ مه‌به‌ستێ، دێ سه‌ره‌دانا به‌غدا كه‌ت، چونكه هه‌رێمێ و به‌غدا پێگیریا خوه ب رێككه‌فتنێ یا راگه‌هاندی و هیچ رێگریه‌ك ل به‌رده‌م بجهئینانا وێ رێككه‌فتنێ نینه.
د. به‌شیر حه‌داد، جێگرێ سه‌رۆكێ جڤاتا نوونه‌رێن عیراقێ، گۆت” هه‌ر ده‌مێ ده‌ست ب به‌لاڤكرنا پشكێن پارێزگه‌هێن عیراقێ ژ بودجا گشتی یا عیراقێ بۆ سالا 2021 هاته كرن، پێدڤیه پشكا هه‌رێما كوردستانێ ژی بهێته هنارتن، چونكه بودجه یا بوویه قانوون و هیچ به‌ربه‌سته‌ك ل به‌رده‌م بجهئینانا رێككه‌فتنا د ناڤبه‌را هه‌رێما كوردستانێ و به‌غدا ل دۆر قانوونا بودجه‌ی نینه و دێ ئه‌و رێككه‌فتن هێته بجهئینان، ژ به‌ركو هه‌ردو لایه‌نان پێگیریا خوه یا راگه‌هاندی”.
حه‌داد گۆت ژی” بۆ بجهئینان و دانانا میكانیزمه‌كی بۆ رێككه‌فتنا هه‌رێما كوردستانێ و به‌غدا ل دۆر بودجه‌ی و هنارتنا پشكا هه‌رێما كوردستانێ و پێگیریا هه‌رێمێ، بریاره شانده‌كێ وه‌زاره‌تا دارایی یا هه‌رێما كوردستانێ سه‌ره‌دانا به‌غدا بكه‌ت، كو پێدڤیه به‌غدا ژی پشكا هه‌رێما كوردستانێ بۆ هه‌ر چار هه‌یڤێن ئه‌ڤ ساله ڤرێكه‌ت، چونكه بودجه بۆ ساله‌كێ یه، نه‌كو چه‌ند هه‌یڤان”.
ژلایێ خوه‌ڤه، د. فازل نه‌بی، بریكارێ پێشتر یێ وه‌زاره‌تا دارایی یا عیراقێ، راگه‌هاند” هیچ كێشه‌ك ل به‌رده‌م بجهئینانا رێككه‌فتنا هه‌رێما كوردستانێ و به‌غدا ل دۆر بودجه‌ی نینه، تنێ دڤێت شانده‌كێ هه‌رێمێ بچیته به‌غدا بۆ چاوانیا خه‌رجكرن و دانانا ئالیه‌ته‌كێ بۆ خه‌رجكرنێ، له‌وما یا گرنگه له‌ز د چوونا شاندێ هه‌رێمێ بۆ به‌غدا بهێته كرن”.
گۆت ژی” ژ نوكه و وێڤه حوكمه‌تا به‌غدا دێ ده‌ست بجهئینانا پشكا پارێزگه‌هان كه‌ت پێدڤیه پشكا هه‌رێمێ ژی د وی چارچۆڤه‌ی دا بهێته خه‌رجكرن، چاڤه‌رێ ژی دهێته كرن ل هه‌یڤا داهاتی پشكا هه‌رێما كوردستانێ بهێته هنارتن، به‌لێ چه‌ند زوو ئه‌و پرسه بهێته ئێكلاكرن باشتره، چونكه رێككه‌فتن یا هه‌ی و قانوونا بودجه‌ی یا هاتیه په‌سه‌ندكرن و تنێ بجهئینانا وێ یا مای”.
