دەقێ گوتارا بەرێز مەسرور بارزانی
بناڤێ خودایێ مەزن و دلوڤان
ئامادەبوویێن عەزیز..بخێرھاتنا ھەمی لایەکێ دکم بو ڤەکرنا ئەڤی پروژەی، ئەڤ پروژەیە بتنێ خزمەتا خەلکێ دھوکێ ناکت، بەلکو یا ھەمی کوردستانێ و وان گەشتیاران ژی یێن کو سەرەدانا کوردستانێ دکن.د بەرنامێ حکومەتێ دا مە دوو ئارمانجێن سەرەکی ھەبینە، ئێک ژ وان چاکسازی و یا دیتر ژی ھەمەجور کرنا ئابوورێ کوردستانێ یە.د ھەمەجورکرنا ئابوورێ کوردستانێ دا ھەمی پێکولەکێ دێ کین بو ھندێ پروژێن گەشتیاری دگەل بەرنامێ دیتر یێ ئابووری وەکی چاندن و پیشەسازیێ جێبەجێ بکین، بو کو ژێدەرێ داھاتی ل کوردستانێ زێدەتر ببت و نەچار نەبین بتنێ پشتبەستنێ ل سەر ئێک ژێدەرێ داھاتی بکین.داخواز دکم پشکداربن بو جێبەجێکرنا بەرنامێ حکومەتێ، ژ پێخەمەت دامەزراندنا ژێرخانەکا ئابووری یا بھێز ل کوردستانێ.مە دەست ب بەرنامێ چاکسازیێ ل حکومەتا ھەرێما کوردستانێ کریە و دێ بەردەوام بین، گەلەک ئاستەنگ بو حکومەتێ و کابینەیا نەھێ دھێنە دروستکرن بو ھندێ چاکسازی نەھێتە جێبەجێکرن، بەلێ دێ بەردەوامبین وب پشتەڤانیا خودێ و یا ھەوە ھیچ کەسەک نەشێت مە براوەستینت.راستە ئاستەنگ گەلەکن و رەنگە بەرژەوەندیا ھندەک کەسان دگەل وێ چەندێ نەبت چاکسازیا راستەقینە ل ھەرێما کوردستانێ بھێتە ئەنجامدان، بەلێ ئەز حەزدکم ھەمی بزانن ئەو چەندا مە کری مە ب بیروباوەر کریە، من بخوە باوەریەکا تەمام ب پشتەڤانیا ھەوە ھەیە وەکی خەلکێ کوردستانێ، بو ھندێ د جێبەجێکرنا بەرنامێ چاکسازیێ دا بەردەوام بین، ئەز بخوە پشتەڤانیا ھەمی لایەکێ و خەلکێ کوردستانێ دکم بو جێبەجێکرنا چاکسازیێ.سالەکی نەخوەش مە دەرباز کر، بەلاڤبوونا پەژیکا کورونایێ و دابەزاندنا بوھایێ نەفتێ، رەوشا ئابووری تێکچوو و کاریگەریەکا خراب ھەبوو ل سەر ھەرێما کوردستانی و ژیانا ھاولاتیان، بەلێ د جھێ خوەدایە سوپاسیا خەلکێ دھوکێ و ھەمی ھەرێما کوردستانێ بکم، کو خوەراگربوون و باوەریا خوە ژ ھەرێما کوردستانێ و کابینەیا حکومەتێ بەرنەدان. سەرەرای ھندێ ژی ئەو بوو یازدەمین ھەیڤە حکومەتا عیراقێ بودجەیا ھەرێما کوردستانێ نەھنارتیە، بەلێ ئەم دێ بەردەوام بین و ناراوەستین د جێبەجێکرنا پروژەیان و ل سەرانسەری ھەرێما کوردستانێ ژی دێ مە پروژێن ستراتیژی ھەبن.حەزدکم پشتراستبن ژ داھاتیێ رەوشا ھەرێما کوردستانێ گەلەک بەرەڤ باشتر دچت و ئابووری یا کوردستانێ بەرەڤ پێشتر دچت، بو ھندێ دێ مە پێدڤی ب پشتەڤانی وپشکداریا ھەوە ھەبت، چ وەک ھاولاتی و وەک کەرتێ تایبەت وحکومەت، بو ھندێ کوردستانێ بەرەڤ پێشتر ببین.سەقامگیریا ئەمنی وسیاسی گرنگە، دگەل ھندێ سەقامگیریا سیاسی ل ھەرێما کوردستانێ بھێتە پاراستن، سەقامگیری و ئاسایشا کوردستانێ ژی دڤێت بھێتە پاراستن وھەمی تشتەکێ بو وێ مەرەمێ دێ کین. ل دوماھیێ جارەکا دیتر سوپاسیا ھەوە دکم و خودایێ مەزن نڤێژ وتاعەتێ ھەمی لایەکێ قەبویل بکت، خودایێ مەزن ژییێ سەروکێ مە درێژ بکت، ھیڤیدارم خەلک وھاولاتیێن دھوکێ وکوردستانێ دەمەکی خوەش دناڤ وی پروژەی دا ببنە سەر.زور سوپاس بو ھەوە بھیڤیا سەرکەفتنێ و کوردستان ژی دێ ھەر ئاڤەدان بت.
