كۆمسیۆنا هه‌لبژارتنێن عیراقێ: 124 حزب ولایه‌نێن سیاسی بۆ هه‌لبژارتنان خوه تۆماركریه
كۆمسیۆنا بلند یا هه‌لبژارتنان ل عیراقێ راگه‌هاند، ژ سه‌رجه‌مێ 265 حزب و لایه‌نێن سیاسی كو ب فه‌رمی مۆله‌تا كاركرنێ یا هه‌ی، نێزیكی 124 لایه‌نێن سیاسی دێ پشكداریێ د هه‌لبژارتنێن پێشوه‌خت یێن جڤاتا نوونه‌رێن عیراقێ دا كه‌ن كو بریاره ل 10/10/2021 بهێنه ئه‌نجامدان.
جومانه غه‌لای، په‌یڤدارا كۆمسیۆنا بلند یا هه‌لبژارتنان ل عیراقێ گۆت” ده‌رگه‌هێ خوه تۆماركرنا هێز و لایه‌نێن سیاسی و كه‌سایه‌تیێن سه‌ربخوه بۆ هه‌لبژارتنێن داهاتی یێن عیراقێ هه‌تا ده‌ستپێكا ڤێ هه‌یڤێ بوو و نه‌هاته درێژكرن”.
جومانایێ گۆت ژی” هژمارا وان لایه‌نێن سیاسی و كه‌سێن سه‌ربخوه یێن ناڤێن خوه تۆماركرین بۆ خوه به‌ربژاركرنێ بۆ هه‌لبژارتنێن داهاتی گه‌هشتیه هزار و 116 قه‌وارێن سیاسی”.
خویاكر ژی” د نوكه دا 265 حزب و لایه‌نێن سیاسی ب فه‌رمی خوه تۆماركریه و هه‌تا نوكه ژ وێ هژمارێ 124 هێز و لایه‌نێن سیاسی ب فه‌رمی راگه‌هاندیه كو دێ پشكداریێ د هه‌لبژارتنێن داهاتی یێن جڤاتا نوونه‌رێن عیراقی دا كه‌ن، هه‌ڤده‌م 38 هه‌ڤپه‌یمانیێن فه‌رمی یێن هه‌ین و هه‌تا نوكه 11 هه‌ڤپه‌یمانیان خوه بۆ هه‌لبژارتنێن داهاتی تۆماركریه”.
ژلایه‌كێ دی ڤه، كۆمسیۆنا بلند یا هه‌لبژارتنان ل عیراقێ ب مه‌ره‌ما چاڤدێریكرنا هه‌لبژارتنێن عیراقێ ب هه‌ماهه‌نگی ل گه‌ل وه‌زاره‌تا ده‌رڤه یا عیراقێ لژنه‌ك بۆ داخوازكرنا نوونه‌رێن وه‌لاتێن بیانی پێكئینایه و بریاره ژی داخوازنامه بۆ 75 وه‌لات و رێكخراوێن نێڤده‌وله‌تی بهێنه هنارتن”.
بریاره ل 10 هه‌یڤا چریا ئێكێ یا داهاتی هه‌لبژارتنێن جڤاتا نوونه‌رێن عیراقی بهێنه ئه‌نجامدان، ب گۆره‌ی داتایێن كۆمسیۆنا بلند یا هه‌لبژارتنان، بۆ وان هه‌لبژارتنان 24 ملیۆن و 907 هزار و 679 وه‌لاتیێن عیراقی مافێ ده‌نگدانێ یێ هه‌ی، ژ وێ هژمارێ ژی هه‌تا نوكه نێزیكی 16 ملیۆن وه‌لاتیان تۆمارا بایۆمه‌تری نووكریه و 14 ملیۆن و 316 هزار وه‌لاتیان ژی كارتێن ده‌نگدانێ وه‌رگرتینه”.
