نووچه
بەرێز عومەر ئۆرەیی: ئەنفال و کومکۆژیا بارزانیان ب رەشترین رۆپەلێن دیروکا سیاسییا حوکمڕانییا عێراقێ دگەل گەلێ کورد ل قەلەم ددەین و شەرمزار دکەین
پێش ٤۱ سالان؛ د رۆژەکا وەکی ئەڤرۆدا ل رۆژا ۱۹۸۳/۷/۳۱ رژێما بەعسا خوین مێژ د هەلمەتەکا هۆڤانە و دویر ژ وژدانا مرۆڤایەتیێ دا، ۸٠٠٠ زەلامێن پیر و گەنج و زارۆکێن بارزانیان، هەر ژ تەمەنێ (۹ تا ۹٠) سالی، ب دڕندانە ل بیابانێن باشوورێ عێراقێ كۆمەڵكوژ و بن ئاخکرن.
ل سالا ١٩٧٥ێ پێش ئەنفالکرنا بارزانیان، ب زۆری بۆ باشوورێ عێراقێ هاتنە ڤەگۆهاستن، پاشان ل سالا ۱۹۸٠ێ هینانە ئۆردوگایێ قوشتەپە و ل هەردوو کۆمەلگەهێن “قودس و قادسیە” هاتنە نیشتەجێکرن، بەری ڤێ ژی ل سالا ۱۹۷۸ێ ئەو بارزانیێن ل جهێن خوە ماین ژی ب زۆری ڤەگۆهاستنە ئۆردوگایێن (دیانا، هەریر، بەحركە و گۆڕەتوو) و کەتنە بن چاڤدێرییەکا توند یا سەربازیدا، ژبەرکو رژێما بەعس گەهشتبوویە وێ باوەری و بڕیارێ کو بارزانی بهێنە ژناڤبرن و قڕکرن بۆ هندێ ئێدی کورد سەرێ خوە ڕانەکەن.
ل ڤێرێ بۆمە دیار دبیت کو رژێمێن شوڤینی یێن عێراقێ، ب درێژاهییا دیرۆکێ هەمی رێک و شێوازێن ئەنفال و قڕکرن و ژناڤبرنێ ل هەمبەر گەلێ کورد و ب تایبەت بارزانییان بکار ئیناینە بۆ هندێ کوردان بێدەنگ بکن، لێ هیچ جارەکی گەلێ کورد بێ ئومێد نەبوویە، بەروڤاژی رژدتر و خوراگرتر بووینە ب درێژەپێدانا خەباتا خوه هەتا سەرھلدان و ئازادیا ئەڤرۆ یا ھەرێما کوردستانێ دەستڤەهاتی.
ئەم وەکو لقێ هەشت یێ پارتی دیموکراتی کوردستان ل زاخۆ ئەنفال و کومکۆژیا بارزانیان ب رەشترین رۆپەلێن دیروکا سیاسییا حوکمڕانییا عێراقێ دگەل گەلێ کورد ل قەلەم ددەین و شەرمزار دکەین و ب هەلکەفتا ڤێ یادا خەمگین سەرێ خوە بۆ گیانێ شەھیدان و قوربانیێن ئەنفالا بارزانیان و تەڤایا شەھیدێن رێیا ئازادی و رزگاریخوازا کورد و کوردستانێ و سەرکاروانێ وان بارزانیێ نەمر و کاک ئیدریسێ جانەمەرگ دچەمینین.
عومەر ئۆرەیی
بەرپرسێ لقێ ۸ێ پارتی دیموکراتی کوردستان ل زاخۆ
۲٠۲٤/۷/۳۱
