نێچیرڤان بارزانی و شاندەکا سەربازی یا بریتانی کۆم بوون
سەرۆکێ حکومەتا ھەرێما کوردستانێ شڤێدی پێشوازی ل مەزنە شیرەتکارێ سەربازی یێ بریتانیا بۆ رۆژھەلاتا ناڤین و نوونەرێ تیرێزا مەی، سەرۆکوەزیرا بریتانیا و شاندەکا د گەل دا کر.
ل گورەی راگەھاندنەکا حکومەتێ، جەنەرال سێر جۆنز لۆریمەر، مەزنە شیرەتکارێ سەربازی یێ بریتانیا بۆ رۆژھەلاتا ناڤین د کۆمبوونا د گەل نێچیرڤان بارزانی دا سەرکەفتن و قوربانیێن خەلکێ ھەرێمێ و پێشمەرگەی د شەرێ دژی تیرۆرێ دا و ھەڤکاری و ھەماھەنگیا د ناڤبەرا پێشمەرگەی و شیرەتکارێن سەربازی یێن بریتانی د وی شەری دا ب بلند نرخاند.
شاندا بریتانیا پشتەڤانیا وەلاتێ خوە بۆ ھاریکاریا پێشمەرگەی و مۆدێرنکرنا وێ وەزارەتێ، ھەروەسا زێدەتر گرنگیدان ب پەیوەندیێن لەندەن و ھەولێرێ دیار کر.
ژ ئالیێ خوە ڤە ژی نێچیرڤان بارزانی سوپاسیا ھاریکاریێن بریتانیا بۆ پێشمەرگەی د شەرێ داعشێ دا کر و خواست ھەماھەنگیا ھەردو ئالیان بەردەوام بیت.
د بەشەکی دی یێ کۆمبوونێ دا رەوشا دەڤەرێ ب گشتی و پەیوەندیێن ھەولێر و بەغدا و بریارا ڤەکرنا فرۆکخانەیێن ھەولێر و سلێمانی، ھەروەسا خەرجکرنا پشکەکا مووچەیێ فەرمانبەران گۆتوبێژ کر.
