ئه‌مریكا پشته‌ڤانییا خوه بۆ هێزێن پێشمه‌رگه‌ی دوپات كر
ویلایه‌تێن ئێكگرتی یێن ئه‌مریكا پشته‌ڤانییا خوه بۆ هێزێن پێشمه‌رگه‌ی دوپات كر و راگه‌هاند؛ ئه‌و ئاماده‌نه هه‌ر هاریكاریه‌كێ بۆ باشكرنا په‌یوه‌ندیێن هه‌ولێر و به‌غدایێ پێشكێش بكه‌ت.
ل گۆره‌یی مالپه‌رێ فه‌رمی یێ حكومه‌تا هه‌رێمێ، نێچیرڤان بارزانی سه‌رۆكێ حكومه‌تا هه‌رێما كوردستانێ پێشوازی ل ژه‌نه‌رال وولته‌ر پایێت فه‌رماندارێ نوو یێ هێزێن هه‌ڤپه‌یمانان ل ئیراقێ و كێن گرۆس كۆنسۆلێ گشتی یێ ئه‌مریكا ل هه‌رێما كوردستانێ و شانده‌كا لگه‌ل كر.
د كۆمبوونا هه‌ردو ئالییان دا، شاندا ئه‌مریكی خوه‌شحالیا خوه ب هاریكاری و هه‌ماهه‌نگییا د ناڤبه‌را هێزێن پێشمه‌رگه‌ی و هێزێن هه‌ڤپه‌یمانان نیشان دا و به‌رهه‌ڤیا وه‌لاتێ خوه بۆ به‌رده‌وامی و مۆكمكرنا زێده‌تر یا وێ هاریكاری و هه‌ماهه‌نگیێ و باشتركرنا په‌یوه‌ندیێن هه‌ولێر و به‌غدایێ نیشان دا.
ژ ئالیێ خوه‌ڤه بارزانییێ سه‌رۆكوه‌زیر، به‌رهه‌ڤییا هه‌رێما كوردستانێ بۆ هه‌ر هاریكاری و هه‌ماهه‌نگیه‌كێ نیشان دا ب تایبه‌ت ل وان ده‌ڤه‌رێن مه‌ترسیا تیرۆرێ تێدا سه‌رهه‌لده‌ت و دووپاتی ل هه‌بوونا میكانیزمه‌كا مۆكم د ناڤبه‌را هه‌ولێر و به‌غدایێ ب پشته‌ڤانییا هه‌ڤپه‌یمانان كر.
هه‌روه‌سا نێچیرڤان بارزانی دوپاتی ل پلانه‌كا سیاسی و ئابووری و جڤاكی یا هه‌مه ئالییانه كر،كو ببیته ئه‌گه‌ر ئاواره ڤه‌گه‌رنه جهێن خوه و ده‌ڤه‌رێن خوه ئاڤه‌دان بكه‌ن .
