فوئاد مه‌عسووم ژ بریارا خوه لێڤه‌بوو
سه‌رۆككۆماری یا ئیراقێ ژ هه‌لوه‌ستێ خوه یێ ل دۆر پرۆژه‌یاسایا بودجه‌یا ئه‌ڤ ساله لێڤه‌بوو و نڤیساره‌ك پێشكێشی وه‌زاره‌تا داد كر، داكو پرۆژه یاسایی د رۆژنامه‌یا فه‌رمی یا ئیراقێ دا بهێته به‌لاڤكرن.
د به‌یاننامه‌یه‌كێ دا سه‌رۆكاتییا كۆماری یا ئیراقێ به‌لاڤكر: فوئاد مه‌عسووم سه‌رۆكۆمارێ ئیراقێ، ئالیێن به‌رپرسیار ل سه‌رۆكاتییا كۆماری راسپاردینه داكو رێكارێن به‌لاڤكرنا پرۆژه‌یاسایا بودجه‌یا گشتی یا ئه‌ڤ ساله ل رۆژنامه‌یا وقائع ئیراق به‌لاڤكه‌ن.
لگۆره‌ی وێ به‌یاننامه‌یێ ئه‌ڤ پێنگاڤا سه‌رۆكۆماری ژ بۆ به‌رچاڤ وه‌رگرتنا به‌رژه‌وه‌ندا گشتی و پاراستنا مافێن وه‌لاتییان و ئاسانكرنا كارێ سازیێن ده‌وله‌تێ ل سه‌رتاسه‌ری وه‌لاتی بوو.
ئه‌ڤه د ده‌مه‌كی دایه دوهـ مه‌هدی عه‌لاق ئه‌میندارێ گشتی یێ جڤاتا وه‌زیران نڤیساره‌ك بۆ وه‌زاره‌تا داد هنارتبوو و تێدا دیاركربوو كو ده‌مێ یاسایی یێ ئیمزایا سه‌رۆكۆماری ده‌ربازبوو و پرۆژه یاسایا وه‌ك ئیمزاكری دهێته زانین، له‌ورا پێدڤیه ل رۆژنامه‌یا وقائع ئیراق بهێته به‌لاڤكرن، لێ پاشان سه‌رۆكاتییا كۆمارییا ئیراقێ وه‌زاره‌تا داد هایداركربوو كو نابیت پرۆژه‌یاسایا بێ ئیمزایا سه‌رۆككۆماری بهێته به‌لاڤكرن.
