پارێزگارێ هەولێرێ لێبوورین ژ مامۆستایەکی خواست
پارێزگارێ هه‌ولێرێ داخوازا لێبوورینێ ژ وی ماموستایی كر، یێ كو د خونیشاندانێن به‌رییا چه‌ند رۆژان دا، ژ ئالیێ دو كه‌سان ڤه هاتیە قوتان.
ل گۆره‌یی راگه‌هاندنه‌كا پارێزگه‌ها هه‌ولێرێ، ئه‌ڤرۆ نه‌وزاد هادی، پارێزگارێ هه‌ولێرێ، دوور ژ چاڤكێن كامیره‌یان پێشوازی ل وی ماموستایی، یێ كو به‌رییا سێ رۆژان د خوه‌نیشاندانێن ماموستایان دا ل هه‌ولێرێ، ژ ئالیێ دو كه‌سان ڤه هاتبوو قۆتان و رێڤه‌به‌رێ وی یێ قۆتابخانەیێ کر.
پارێزگارێ هه‌ولێرێ ب ناڤێ كارگێری و خه‌لكێ پارێزگه‌هێ لێبوورین ژ وی ماموستایی خواست و سۆز دا رێكارێن قانوونی ل دژی وان دو كه‌سان بهێنه وه‌رگرتن و داخواز كر ئەو كریار كاریگه‌رییێ ل سه‌ر پرۆسه‌یا په‌روه‌ردەیێ نه‌كه‌ت.
دیمه‌نێن قۆتانا وی ماموستایێ سه‌رسپی د تۆرێن جڤاكی دا ده‌نگڤه‌دانه‌كا مه‌زن په‌یدا كربوو و ببۆ ئه‌گه‌ر كو داواكارێ گشتی یێ هه‌ولێرێ سكالایێ ل سه‌ر وان كه‌سان تۆمار بكه‌ت.
