ئالیێن کوردستانی پێدڤی چارەرێیەکا راستبین و ئاشتیانە نە

سەرۆک بارزانی پێشوازی ل شاندەکا بلند یا هەدەپێ کر و رەوشا هەر چوار پارچەیێن کوردستانێ ل گەل گۆتوبێژ کر.
سەرۆک مەسعوود بارزانی  ل پیرمامێ پێشوازی ل شاندەکا بلند یا پارتییا دەمۆکراتیک یا گەلان، هەدەپێ، پێکهاتی ژ پەروین بۆلدان، هەڤسەرۆکا وێ پارتیێ، هەروەسا ئۆسمان بایدەمیر و فەلەکەدین ئوجا و چەندین پەرلەمانتارێن دی یێن هەدەپێ و نوونەرێن وێ ل هەرێما کوردستانێ کر و پێشڤەچوون و گوهەرینێن رەوشا کوردان ل هەر چوار پارچەیان گۆتوبێژ کر.
شاندا هەدەپێ ژی هەڤخەەمیا خوە یا وەغەرکرنا دلۆڤان بارزانی بۆ دیار کر و پاشان داخوازا هەماهەنگی و ئێکرێزیێ ژ هەموو ئالیێن کوردستانی کر، کۆمبوونا خوە ل گەل سەرۆک بارزانی ب گرنگ ناڤ کر و رۆلێ وی د دروسترکرنا وێ ئێکرێزیا پێدڤی دا بلند نرخاند.
ژ ئالیێ خوە ڤە سەرۆک بارزانی سوپاسییا سەرەدانا هەدەپێ و هەلوەستێ کوردێن باکۆرێ کوردستانێ ل دۆر بوویەرێن هەرێما کوردستانێ کر و دا زانین: د هەموو قوناغان دا کوردان داخوازا ئاشتیێ ژ هەڤسوو و داگیرکەرێن وەلاتێ خوە کریە و ب سەپاندنا شەری و زۆرداریێ بەرسڤا وان هاتیە دان.
سەرۆک بارزانی دوپات ژی کر: پێدڤی یە کورد ل سەر وی بنەمایێ خوە یێ ئاشتیخوازیێ بمینن، بەرێ خوە نەدەن زمانێ گەف و چەک و توندوتیژیێ و هەموو ئالیێن سیاسی ب هەڤ را چارەرێیەکا واقعبینانه‌ بۆ پاشەرۆژێ بدانن.