ژبه‌ر سه‌ره‌دانا جبووری روونشتنا سه‌رۆكاتییا په‌ڕله‌مانی هات پاشخستن
كۆمبوونا ئه‌ڤرۆ یا سه‌رۆكاتییا په‌رله‌مانێ كوردستانێ و سه‌رۆك فراكسیۆنان ل دۆر پێداچوونا قانوونا چاكسازییا مووچه‌یێ خانه‌نشینان، ژبه‌ر سه‌ره‌دانا سه‌لیم جبووری هات پاشخستن.
بریاربوو ئه‌ڤرۆ سه‌رۆكاتییا په‌ڕله‌مانی و سه‌رۆك فراكسیۆن كۆمببن و ژڤانه‌كی ژبۆ روونشتنا په‌رله‌مانی یا لدۆر پرۆژه‌یا چاكسازیێ ده‌ستنیشان بكه‌ن، لێ ژبه‌ر سه‌ره‌دانا سه‌رۆكێ جڤاتا نوونه‌رێن ئیراقێ بۆ هه‌ولێرێ، روونشتن هاتییه پاشخستن.
روونشتنا چاڤه‌ڕێكری یا په‌ڕله‌مانی دێ ل ڤێ هه‌فتیێ بیت و تێدا پرۆژه قانوونا چاكسازییا مووچه‌یێ خانه‌نشینان هێت په‌سه‌ند كرن، تایبه‌ت مادده‌یا 3 كو گرێدای مووچه‌یێ په‌رله‌مانتارانه و ره‌خنه‌یێن دژوار پشتی په‌سه‌ندكرنێ ل سه‌ر هاتینه.
ل داوییا مه‌ها شوباتا ئه‌ڤ ساله، پەڕلەمانێ کوردستانێ پرۆژه‌قانوونا چاکسازییا مووچەیێ خانەنشینان كو ژ 23 مادده‌یان پێكدهێت په‌سه‌ندكر، ئه‌و پرۆژه كو ژ ئالیێ حكومه‌تا هه‌رێمێ ڤه هاتبوو ئاماده‌كرن، گه‌ر ب ته‌مامی بهێته بجهئینان، دێ مەھانە 100 تا 150 ملیار دینارێن خانه‌نشینێن نه‌یاسایی بۆ خزینه‌یا گشتی ڤەگەرینیت.
