سه‌رۆك بارزانی سوپاسیا هه‌لوه‌ستێ هه‌ڤسه‌نگ یێ رۆسیا كر
سه‌رۆك بارزانی سوپاسییا هه‌لوه‌ستێ دوستانه و هه‌ڤسه‌نگ و ژیوارانه یێ رۆسیایا فدرال كر و د هه‌مبه‌ر دا بالیۆزێ رۆسیا ل ئیراقێ گرنگیپێدانا وه‌لاتێ خوه بۆ په‌یوه‌ندیێن دگه‌ل هه‌رێما كوردستانێ ئاشكه‌را كر.
د دیداره‌كا د ناڤبه‌را سه‌رۆك بارزانی و ماكسیم ماكسیمۆڤ بالیۆزێ رۆسیا ل ئیراقێ، ناڤبری سلاڤێن تایبه‌ت یێن وه‌زیرێ ده‌رڤه یێ وه‌لاتێ خوه گه‌هاندنه سه‌رۆك بارزانی و ئاماژه ب په‌یوه‌ندیێن دیرۆكی یێن د ناڤبه‌را رۆسیا و گه‌لێ كوردستانێ دا كر و گۆت: هه‌رێما كوردستانێ لنك رۆسیا گرنگییه‌كا تایبه‌ت هه‌یه و وه‌لاتێ وی دخوازیت مامه‌له‌یێ دگه‌ل هه‌رێما كوردستانێ بكه‌ت.
بالیۆزێ رۆسیا ل ئیراقێ هه‌روه‌سا هیڤی خواستن په‌یوه‌ندیێن د ناڤبه‌را رۆسیا و هه‌رێما كوردستانێ دا وه‌رار بكه‌ڤیتێ و به‌رهه‌ڤییا كۆمپانیێن رۆسی بۆ به‌رفره‌هكرنا په‌یوه‌ندیان د كه‌رتێ په‌ترۆل و ئابۆری دا لگه‌ل هه‌رێما كوردستانێ پێش بێخیت.
د هه‌مبه‌ر دا سه‌رۆك بارزانی سوپاسیا هه‌لوه‌ستێ دۆستانه و هه‌ڤسه‌نگ و ژیوارانه یێ رۆسیایا فدرال كر د وان ره‌وشێن سیاسی و وان ته‌حه‌دیاتێن ل چه‌ند مه‌هێن بۆری رووبرووی هه‌رێما كوردستانێ بووین.
ئاشكه‌را ژی كر: پێكڤه ژیان و ئاشتیخوازی و نه‌بوونا حه‌ساسییه‌تا ئۆلی و مه‌زهه‌بی به‌شه‌كێ گرنگ یێ فه‌رهه‌نگا گه‌لێ كوردستانێ پێك دئینن.
هه‌روه‌سا بالیۆزێ رۆسیا ل ئیراقێ سوپاسی بۆ گه‌ل و حكومه‌تا هه‌رێما كوردستانێ هه‌بوون كو پارێزه‌رێن مافێن مه‌سیحی و پێكهاته‌یێن ئۆلی و نه‌ته‌وه‌یێن دیترن.
