نێچیرڤان بارزانی و بالیۆزێ رۆسیایێ په‌یوه‌ندیێن هه‌ولێر و مۆسكۆیێ به‌حس كرن

سه‌رۆكوه‌زیرێن هه‌رێما كوردستانێ و بالیۆزێ رۆسیایێ ل ئیراقێ په‌یوه‌ندیێن د ناڤبه‌را هه‌ولێر و مۆسكۆیێ و چه‌ندین پرسێن دی گۆتوبێژ كرن.
پشتی نیڤرۆ یا ئه‌ڤرۆ نێچیرڤان بارزانی سه‌رۆكوه‌زیرێ هه‌رێما كوردستانێ پێشوازی ل مه‌كسیم مه‌كسیمۆڤ بالیۆزێ رۆسیا ل ئیراقێ و شاندا دگه‌ل دا كر كو پێكهاتبوو ژ كۆنسۆلێ گشتی یێ رۆسیا ل هه‌ولێر و شیره‌تكارێ بالیۆزخانه‌یا رۆسیا و سه‌رۆكێ كۆمپانیا گازپرۆم ل رۆژهه‌لاتا ناڤه‌راست و رێڤه‌به‌رێ نڤیسینگه‌ها هه‌ولێر یا گاز پرۆمێ و شاندا مێهڤان ل ده‌ستپێكا كۆمبوونێ پرس و سه‌ره‌خوه‌شیێن حكومه‌تا رۆسیا ژ به‌ر وه‌غه‌را داویێ یا دلۆڤان ئدریس بارزانی گه‌هاندنه‌ سه‌رۆكوه‌زیرێن هه‌رێمێ و د كۆمبوونێ دا به‌حس ل په‌یوه‌ندیێن دو قۆلی د ناڤبه‌را هه‌ولێر و مۆسكۆ دا هاتنه‌ كرن و هه‌ردو ئالیان به‌رهه‌ڤییا خوه‌ بۆ پێشدابرنا زێده‌تر یا وان په‌یوه‌ندییان د هه‌می بیاڤان دا نیشان دا و هه‌ڤده‌م ده‌ستخوه‌شی ل پێشڤه‌برنا په‌یوه‌ندیێن د ناڤبه‌را هه‌ولێر و به‌غدا ژی دا كر.
هه‌ر د كۆمبوونێ دا سه‌رۆكوه‌زیرێن هه‌رێما كوردستانێ راگه‌هاند: حكومه‌ت و خه‌لكێ هه‌رێما كوردستانێ گرنگییه‌كا مه‌زن د ده‌نه‌ په‌یوه‌ندیێن دگه‌ل رۆسیا و به‌رهه‌ڤییا حكومه‌تا هه‌رێما كوردستانێ بۆ پێشدابرنا په‌یوه‌ندییان د هه‌می بیاڤان دا نیشان دا ب تایبه‌ت بیاڤێ ئابۆری و هه‌می ئاسانكاری بۆ سه‌رمایه‌دارێن رۆسی نیشان دان، داكو وه‌به‌رهێنانێ ل هه‌رێما كوردستانێ بكه‌ن.