ئوسامە نوجێفی: دێ ب مەرج پشتەڤانییا عەبادی کەین
جێگرێ سەرۆککۆمارێ ئیراقێ و سەرۆکێ ھەڤپەیمانییا قەرار یا ھەلبژارتنان راگەھاند؛ وان مەرج بۆ ویلایەتا دووێ یا حەیدەر عەبادی ھەنە.
ئوسامە نوجێفی بۆ رۆژنامەیا شەرقولئەوسەت راگەھاند؛ جوداھیەکا مەزن د دەمێ دەستھەلاتا عەبادی د گەل یا نووری مالکی دا ھەیە و گۆت: عەبادی د ھندەک بادەکان سەرکەفتیە و بتایبەت سەرکەفتنا ل سەر داعشێ ب ھاریکاریا ناڤدەولەتی، لێ ژ روویێ سیاسی ڤە چو پێشکەفتن نەکرینە.
نوجێفی ئاشکرا کر، ئەو دێ ب مەرج پشتەڤانییا عەبادی کەن بۆ ویلایەتا دووێ، ئەو ژی پێدڤییە بەرنامەکێ کاری یێ ئاشکرا و ھەڤپشکیەکا راستینە یا سیاسی ھەبیت.
جێگرێ سەرۆککۆمارێ ئیراقێ راگەھاند ژی؛ ئەو ھزرا زۆرینەیا سیاسی رەت دکەن، ژبەرکو ئەو ھزر ب تنێ بۆ وان وەلاتان باشە یێن پیڤەرێن دروست یێن دیمۆکراسیێ لێ ھەبن، زۆرینەیا سیاسی د گەل پەراوێزخستنا سوننە و کوردان ل ئیراقێ دێ بیتە دکتاتۆریەتەکا نوو ب ناڤێ زۆرینەیێ.
