گەلێ کورد و جیهانا پێشکەفتی خوەدان هەمان بنەما نە

سەرۆکوەزیرێ هەرێما کوردستانێ پشکداری رێورەسمێن دانانا بەرێ بنیاتێ یێ کۆمەلگەها نوو یا قۆنسولخانەیا ئەمریکا ل هەولێرێ بوو و دوپاتی ل پەیوەندیێن دیرۆکی یێن کوردستانێ و ئەمریکا کر.
نێچیرڤان بارزانی، سەرۆکوەزیرێ هەرێما کوردستانێ ئەڤرۆ ل هەولێرا پایتەخت، ب ئامادەبوونا دووگلاس سیلیمان، بالیۆزێ ئەمریکا ل ئیراقێ، د رێورەسمەنێن دانانا بەرێ بنیاتێ یێ کۆمەلگەها نوو یا قۆنسولخانەیا ئەمریکا ل هەولێرێ دا گۆتارەک خواند و راگەهاند: گەل و هەروەسا حکومەتا هەرێما کوردستانێ باوەرییەکا ب هێز ب وان بنەمایێن کو ئەمریکا و جیهانا پێشکەفتی ل سەر هاتین ئاڤاکرن، مینا دیمۆکراسی، مافێن مرۆڤان ب گشتی و پاراستنا مافێن تاک و پێکهاتەیان هەیە.
دیار ژی کر: پەیوەندیێن گەلێ کورد و ئەمریکا دیرۆکی نە، واشنتۆنێ ب هەڤپشکی رۆلەکێ دۆستانە و بەرچاڤ د سەرهلدانا 1991ێ، ئێخستنا رژێما بەعس و تا شەرێ دژی داعشێ ژی ل گەل هەرێما کوردستانێ هەبوو.
سەرۆکوەزیر بارزانی دا زانین ژی: حکومەتا هەرێمێ دەستخوەشیێ ل کار و چالاکیێن ئەمریکا ل هەرێمێ دکەت و دخوازیت ب هەموو رەنگان پەیوەندیێن سیاسی، بازرگانی، زانستی و کولتوری یێن خوە ل گەل ئەمریکا پێشڤە ببەت.