دڤێت كادرێن پارتى كار بكه‌ن هه‌موو ده‌نگده‌رێن وێ ده‌نگى بده‌ن
د كه‌مپینا سێ یێ یا پارتى دیمۆكراتى كوردستان دا بۆ هه‌لبژارتنێن ئیراقێ ل هۆلا پێشانگه‌ها نێڤده‌وله‌تى ل هه‌ولێرێ، ب ئاماده‌بوونا جه‌ماوه‌ره‌كێ مه‌زن یێ پارتى ژ ئه‌ندام و ئالیگرێ وێ حزبێ، نێچیرڤان بارزانى جێگرێ سه‌رۆكێ پارتى دیمۆكراتى كوردستان د په‌یڤه‌كێ دا راگه‌هاند: پارتى دخواست هه‌موو ئالیێن كوردستانى ب ئێك لیست پشكدارى هه‌لبژارتنان ببن، لێ هنده‌ك ئالییان ئه‌ڤ یه‌كه ره‌تكر، گۆت ژى، پارتى دێ هه‌ر پێشه‌نگ و هێزا ئێكێ یا كوردستانێ مینیت.
نێچیرڤان بارزانى جێگرێ سه‌رۆكێ پارتى دیمۆكراتى كوردستانى ژ ئه‌ندام و ئالیگرێن پارتى ژى خواست هه‌ر ژ نها كار بكه‌ن كو ل رۆژا هه‌لبژارتنان پترین ده‌نگده‌ر بچنه سه‌ر سندۆقێن ده‌نگدانێ و ده‌نگى بده‌نه لیستا پارتى دیمۆكراتى كوردستان. جێگرێ سه‌رۆكێ پارتى دیمۆكراتى كوردستان سۆز دا ژى ، كو پارتى ب هه‌مان گیانێ فیداركارى و پاراستنا ده‌ستكه‌فتێن هه‌رێمێ دێ چیته به‌غدا. هه‌روه‌سا نێچیرڤان بارزانى راگه‌هاند ژى، كو خه‌لكێ هه‌رێما كوردستانێ ژبه‌ر وێ یه‌كێ ده‌نگى دده‌ته پارتى داكو ل به‌غدا رێكێ ل ئالیێن دى بگریت یێن پیلانان دژى هه‌رێما كوردستانێ د دانن. ل داوییا په‌یڤا خوه نێچیرڤان بارزانى داكوكى لسه‌ر وێ یه‌كێ كر كو یه‌ك ده‌نگ ژى گه‌له‌ك گرنگه و دوباره داخواز ژ ده‌نگده‌رێن پارتى كر هه‌موو ده‌نگێ خوه بده‌ن
