پەیوەندییەکا نھێنی یا ئەمریکا و سەدری ھات ئاشکرا کرن
ئاژانسەکا ئەمریکی ئاشکرا کر، کو ژ سالا دوھزار و حەفتێ تا نھا ب ئاوایەکێ نھێنی ئەمریکا پەیوەندی د گەل سەدری دا ھەبووینە.
ئاژانسا ئەسۆشەیتد پرێس د راپۆرتەکێ دا دیارکر: ژ سالا دوھزار و حەفتێ وەرە ئەمریکا و موقتەدا سەدر رێبەرێ رەوتا سەدر پەیوەندییەکا نھێنی ھەبوویە، ئاماژەکر کو پیتەر فیڤەر یەک ژ دیپلۆماتکارێن تیما جۆرج بوش سەرۆکێ بەرێ یێ ئەمریکا گۆتبوو: پشتی شەرێ ئەمریکا و سوپایێ مەھدی یێ سەر ب سەدری ڤە، واشنتۆنێ ھەست پێ کر، کو سەدر دکاریت بۆچوونێن خوە یێن سیاسی بگوھەریت و رەنگە پاشەرۆژەکا باشتر ب دەستڤە بینیت و دەستھەلاتا ئیراقێ وەربگریت.
ل گۆرەیی راپۆرتا ناڤھاتی سەلاح عوبێدی پەیڤدارێ نڤیسینگەھا سەدری راگەھاندیە؛ موقتەدا سەدری دێ پەیوەندییەکا ھەڤسەنگ د گەل واشنتۆنێ دا ھەبیت.
بەری نھا سەدری ب توندی ل دژی رۆلێ ئەمریکا و ئیرانێ ل ئیراقێ راوەستابوو و چەندین جاران داخۆیانی ل دژی وان دابوون.
