پێدڤی یە سەرۆککۆمارێ نوو یێ ئیراقێ رێفراندۆمچی بیت

بریارە ڤێ هەفتیێ پارتی و ئێکەتی ل دۆر پێکئینانا شاندەکا هەڤپشک بۆ بەغدا کۆم ببن و ئەندامەکێ سەرکرداتیا پارتی ژی دبێژیت: پێدڤی یه‌ سەرۆککۆمارێ نوو یێ ئیراقێ رێفراندومچی بیت.
د. ئاراس حەسۆ میرخان، ئەندامێ سەرکرداتیا پارتییا دیمۆکرات یا کوردستانێ بۆ وار راگەهاند: پارتی دێ ڤێ هەفتیێ ل گەل ئێکەتیێ کۆم بیت و بزاڤان کەت ل گەل هەر شەش ئالیێن نەرازی ژی کۆم بیت، داکو شاندەکا هەڤپشک بهێتە پێکئینان و ب یەک هەلویستی پشکداری دانوستاندنێن پێکئینانا حکومەتا نوو ل گەل ئالیێن ئیراقی بیت.
دەربارەی پۆستێ سەرۆککۆمارێ ئیراقێ ژی، دا زانین: بەریا نها پارتی گەلەک جاران دەستکەفتێن خوە یێن هەلبژارتنان داینە پارتیێن دی یێن کوردستانی، پۆستێ سەرۆککۆماری ژی دەستکەفتێ پارتییە.
د. ئاراس حەسۆ میرخانی دوپات ژی کر؛ ئەڤجار گەر پارتی ب خوە ژی کەسەکی بۆ پۆستێ سەرۆککۆمارێ ئیراقێ دەستنیشان نەکەت و وی پۆستی بدەتە پارتییەکا دی، پێدڤی یە رازەمەندیا پارتی ل سەر وی کەسی هەبیت و رێفراندومچی بیت، گەر نە دەنگدەر و ئالیگرێن پارتی پشتی بوویەرێن پار وێ یەکێ قەبوول ناکەن.