ب په‌سه‌ندكرنا پرۆژێ چاكسازییان دێ ده‌ستكارییا پاشكه‌فتا مووچه‌یی هێت كرن
وه‌زیرێ دارایی و ئابووری یێ حكومه‌تا هه‌رێما كوردستانێ راگه‌هاند ؛ گه‌ر پرۆژه‌یاسایا چاكسازییا مووچه‌یێ خانه‌نشینان بهێته په‌سه‌ندكرن، دێ ده‌ستكارییا پاشكه‌فتا مووچه‌ی هێته كرن.
رێباز حه‌ملان وه‌زیرێ دارایی یێ حكومه‌تا هه‌رێما كوردستانێ بۆ مالپه‌رێ فه‌رمی یێ حكومه‌تا هه‌رێمێ گۆت : گه‌ر پرۆژه‌یاسایا چاكسازییان كو نها ل په‌ڕله‌مانێ كوردستانی یه، وه‌ك خوه بهێته بجهئینان و پاره‌یێ پێدڤی ژ خانه‌نشینێن نه‌ئاسایی بهێته بڕین، دێ كوژمه‌كێ مه‌زنێ پاره‌یی بۆ حكومه‌تێ ڤه‌گه‌ریت و حكومه‌ت شێت ده‌ستكارییا پاشكه‌فتا مووچه‌یێ فه‌رمانبه‌ران كه‌ت.
گۆت ژی : نها مه‌هانه 110 تا 130 ملیار دیناران وه‌كو داهاتێ ناڤخوه دهێنه به‌رده‌ستێ حكومه‌تێ و داهاتێ په‌ترۆلێ ژی مه‌هانه نێزیكی 400 ملیار دینارانه و ب ڤێ یه‌كێ ژی حكومه‌ت دێ شێت دگه‌ل پاره‌یێ ژ پرۆژێ چاكسازییان ڤه‌دگه‌ریت، گهۆرینه‌كا باش بێخیته مووچه‌یێ فه‌رمانبه‌ران.
ل داوییا مه‌ها شوباتا ئه‌ڤ ساله، پەڕلەمانێ کوردستانێ پرۆژه‌قانوونا چاکسازییێن مووچەیێ خانەنشینان كو ژ 23 مادده‌یان پێكدهێت په‌سه‌ندكر، ئه‌و پرۆژه كو ژ ئالیێ حكومه‌تا هه‌رێمێ ڤه هاتبوو ئاماده‌كرن، گه‌ر ب ته‌مامی بهێته بجهئینان، دێ مەھانە 100 تا 150 ملیار دینارێن خانه‌نشینێن نه‌یاسایی بۆ خزینه‌یا گشتی ڤەگەرینیت.
پشتی په‌سه‌ندكرنا وێ قانوونێ، نه‌رازیبووونه‌كا مه‌زن په‌یدابوو ب تایبه‌ت ل سه‌ر مووچه‌یێن پله بلند و په‌رله‌مانتاران، له‌و سه‌رۆكاتییا په‌ڕله‌مانی دووباره ئه‌و قانوونه ڤه‌گه‌راند و دێ پێداچوون تێدا هێته كرن.
