عه‌لاوی هۆشداری ژ دوباره‌بوونا سیناریۆیا 2010 دان
ئێتێلافا وه‌ته‌نییه ئه‌ڤرۆ هۆشدار ژ دوباره‌بوونا سیناریۆیا هه‌لبژارتنێن سالا2010ێ دان و ژ ئالیێن سیاسی خواست جاره‌كا دی تووشی وێ شاشیێ نه‌بن.
ئێتێلافا وه‌ته‌نییه ب سه‌رۆكاتییا ئه‌یاد عه‌لاوی ئه‌ڤرۆ د به‌یانه‌كێ دا دیاركرییه، ده‌لیڤه هه‌یه، سیناریۆیا هه‌لبژارتنێن2010ێ دوباره ببیت و ب مایتێكرنا چه‌ندین وه‌لاتێن ده‌ڤه‌رێ گرفتا سه‌خته‌كاری و ده‌ستكارییا د ئه‌نجامێن هه‌لبژارتنان بهێت پشتگوهـ هاڤێتن.
هه‌روه‌ها هاتییه: ئێتێلافا وه‌ته‌نییه باوه‌رییه‌كا ته‌مام ب ده‌ستهه‌لاتا دادوه‌رییا ئیراقێ هه‌یه كو دێ بریاره‌كا دادپه‌روه‌رانه د وێ ده‌ربارێ دا ده‌ت.
د هه‌لبژارتنێن 2010ێ دا، ئێتێلافا ئه‌یاد عه‌لاوی سه‌ركه‌فتییا ئێكێ یا هه‌لبژارتنان بوو و 90 كورسی ب ده‌ست خستبوون، لێ دادگه‌ها فیدرال ل وی ده‌می بریار دا كو مه‌زنترین هه‌ڤپه‌یمانی پشتی هه‌لبژارتنان حكومه‌تێ پێكدئینیت نه‌كو مه‌زنترین لیستا سه‌ركه‌فتی.
ئێتێلافا وه‌ته‌نییه ژی د به‌یانا خوه یا ئه‌ڤرۆ دا دیاركرییه، هه‌موو ده‌رده‌رسه‌ریێن ئیراقێ، ژ ئه‌وێ شاشیێ ده‌ست پێ كرینه و ده‌لیڤه هه‌یه، ئه‌و یه‌ك دوباره ببیته‌ڤه.
