سەرۆک بارزانی دگەل شاندێن فەتح و دەولەتا قانوونێ کۆمبوو

سەرۆک بارزانی دگەل شاندێن فەتح و دەولەتا قانوونێ کۆمبوو، د دیدارەکێ دا شاندا ناڤھاتی دوپاتی ل پەیوەندیێن دیرۆکی د ناڤبەرا گەلێ کوردستانێ و ھێزێن ئیراقی دا کر.
سەرۆک مەسعوود بارزانی، ئەڤرۆ پێشوازی ل شاندا ھەڤپشکا دانوستاندکار یا لیستەیێن فەتح و دەولەتا قانوونێ کر، د ھەڤدیتنا سەرۆک بارزانی دا شاندا ناڤھاتی داخواز کر ھەموو ئالی پێکڤە ل ئیراقێ قۆناغەکا نوو دەستپێبکەن و شاشیێن بۆری دوبارە نەکەن و گۆت: بێ تەوافق و شەراکەتا راستەقینە د شیان دا نینە پرۆسەیا سیاسی ب رێڤە بچیت و چ دەستکەڤت ژی بۆ چ ئالییەکی ب دەستڤە بھێن.
شاندا فەتح و دەولەتا قانوونی بەحس ل پێکئینانا ھەڤپەیمانییا مەزن یا پەرلەمانی و نڤیسینا پرۆگرامێ ئیدارەیا وەلاتی کر،د وێ کۆمبوونێ دا ھەردو ئالی ھەڤرێ بوون، کو پێدڤییە پەیوەندیێن دیرۆکی و بجھئینانا دەستووری و لۆژیک و عەقلانیەک ببیتە ھێڤێنێ پرۆسەیا سیاسی، ھەروەسا پرەنسیپێن شەراکەت و تەوافق و ھەڤسەنگیێ د پرۆسەیا سیاسی دا بھێت پەیرەو کرن و ل ژێر رۆشنایا وان پرەنسیپان، ھەڤپەیمانییا مەزنا پەرلەمانی بھێت پێکئینان و حکومەتا نوو بھێت دامەزراندن.