خوه‌نیشاندانێن به‌رفره‌هـ ل 5 ئێڤاری دێ هێن كرن
خوه‌نیشاندانێن نه‌رازیبوونێ ئه‌ڤرۆ ل به‌غدا ژی ده‌ست پێ كرن و نیازه ل سات 5ی ئێڤاری بهێن به‌رفره‌هـ كرن.
چاڤه‌رێ دهێت كرن، ل سات 5ی ئێڤاری، خوه‌نیشاندانێن به‌رفره‌هـ ل به‌غدا ده‌ست پێ بكه‌ن، پشتی ئه‌ڤرۆ سپێدێ ل چەندین دەڤەران خڕڤەبوون هاتینه كرن.
خوەنیشاندەرێن به‌غدایێ ژی، داخوازا دابینکرنا خزمەتگۆزارییان و سزادانا به‌رپرسێن گەندەل دکەن.
ئاماده‌كاریێن خوه‌نیشاندانێن به‌غدایێ، هه‌ڤده‌م دگه‌ل رێكارێن توندێن ئێمناهیێ دهێن كو ئه‌ڤرۆ سپێدێ هێزێن پۆلیسان و سوپای ژبۆ به‌رهنگاربوونا خوه‌نیشانده‌ران ئێخستینه كار.
هێزێن ئیراقی ب به‌فره‌هی ل ده‌ردوورا مه‌یدانا ته‌حریر كۆمبووینه، هه‌روه‌ها ب ده‌هان خالێن پشكنینێ و زالگه‌هـ ژی ل هه‌موو ده‌رگه‌هێن به‌غدایێ هاتینه زێده‌كرن.
خوه‌نیشاندانێن ئیراقێ ئه‌ڤرۆ چوونه د رۆژا خوه یا دوازدێ دا، تا نها ژی حكومه‌تێ چ رێچاره ژبۆ جێبه‌جێكرنا داخوازیێن خوه‌نیشانده‌ران نه‌دیتینه.
