چاكسازى ل وه‌زاره‌تا پێشمه‌رگه يا ده‌ستپێكرى
كه‌رێم شنگالى، وه‌زيرێ پێشمه‌رگه ب وه‌كاله‌ت دكۆنفرانسه‌كێ رۆژنامه‌ڤانى دا گۆت”حوكمه‌تا هه‌رێما كوردستانێ ووه‌زاره‌تا پێشمه‌رگه ل گه‌ل وه‌لاتێن هه‌ڤپه‌يمان مه بزاڤێن خو كرينه تاكو دبوارێن پێگه‌هاندن وراهێنانا پێشمه‌رگه‌ى وپرۆگرامێن تايبه‌ت ب پێشمه‌رگه‌ى، كارێ هه‌ڤپشك بكه‌ين”.
كونسۆلێ بريتانيا ب هه‌رێما كوردستانێ ژى راگه‌هاند” بريتانيا ووه‌لاتێن دى يێن هێزێن هه‌ڤپه‌يمانان ل سالا 2016 ول سه‌ر داخوازا سه‌رۆك بارزانى به‌رنامه‌كێ تايبه‌ت دياركريه بۆ ئه‌نجامدانا چاكسازيێ دناڤ هێزا پێشمه‌رگه‌ى دا”.
گۆت ژى” پرۆسا ريفۆرمێ دناڤ پێشمه‌رگه‌ى دا پێنگاڤه‌كا باش بريه”.
دياركر” ب ديتنا مه پێدڤيه پێشمه‌رگه به‌رده‌وام دبوارێ له‌شكرى دا خوه نوو بكه‌ت ودڤێت بگه‌هيته وى ئاستى وشيانێ كو زێده‌رت ژ نوكه روو ب روويێ تيرۆرێ ببيت، چ ژ روويێ ره‌وشه‌نبيرى وچ ژ روويێ لوجيستيكى”.
ديسا گۆت” بريتانيا يا به‌رده‌وامه دهاريكاريكرنا هێزا پێشمه‌رگه‌ى دا دژى تيرۆرێ وداعشێ”.
كه‌ريم شنگالى ئاماژه دا” پێنگاڤا ئێكێ بۆ وێ يه‌كخستن وئێكگرتنێ هاتيه هاڤێتن، ئه‌وژى دروستكرنا رێڤه‌به‌ريه‌كێ بۆ كۆمكرنا بزاڤان ودانانا ستراتيژيا ئێكگرتنێ كو ل به‌رى شه‌رێ داعشێ سه‌رۆكێ هه‌رێما كوردستانێ وسه‌رۆك وه‌زيران وجێگرێ سه‌رۆك وه‌زيران بريار ل وێ ريفۆرم وچاكسازيێ دابوو، به‌لێ هه‌رێما كوردستانێ تووشى شه‌رێ داعشێ بوو وسارى ل وى به‌رنامه‌ى كر، چونكى ئه‌م دشه‌رى دا بووين”.
وه‌زيرێ پێشمه‌رگه ب وه‌كاله‌ت گۆت ژى” چو لايه‌نه‌ك رێگر نينه ل ئێكگرتنێ ويه‌كخستنا پێشمه‌رگه‌ى”.
