پاشه‌رۆژه‌كا گه‌ش و پێشكه‌فتی ل هیڤیا كوردستانێ یه
سه‌رۆك مه‌سعوود بارزانی راگه‌هاند: روودانێن پشتی رێفراندۆمێ زیانێن مه‌زن گه‌هاندن گه‌لێ كوردستانێ، لێ ب پشتراستی ڤه پاشه‌رۆژه‌كا گه‌ش و پێشكه‌فتی ل هیڤیا گه‌لێ كوردستانێ یه.
سه‌رۆك مه‌سعوود بارزانی، په‌یامه‌ك ئاراسته‌ی كۆنفرانسێ فدراسیۆنا كۆمه‌لێن كوردی ل مۆسكۆ كر و تێدا دیار كر: گه‌لێ كورد ب زۆری و بێی خواستە خوە هاته دابه‌شكرن، ڤێ دابه‌شبوونێ ژی كورد تۆشی كاره‌سات و مه‌ینه‌تیێن مه‌زن كر، ب ئه‌نفال و جینوساید و كیمیابارانێ بزاڤا ژناڤبرنا گه‌لێ كورد هاته كرن، لێ خه‌باتا گه‌لێ كورد ب ئیراده‌یه‌كا مه‌زنتر به‌رده‌وام بوو.
بارزانی ئاماژه ب په‌یوه‌ندیێن دیرۆكی یێن هه‌رێم و رۆسیا دا و راگه‌هاند: د سه‌رده‌مێ مه‌لا موسته‌فا بارزانی دا، ئه‌و په‌یوه‌ندی گه‌هشتن گۆپیتكێ، نها ژی هه‌لوه‌ستێن حكومه‌تا رۆسیا ل هه‌مبه‌ری پرسا كوردی و رێدانا چالاكیێن كلتووری و سیاسی جهێ رێزێ نه.
ده‌رباره‌یی روودانێن شازده‌ی ئۆكتوبه‌ری ژی سه‌رۆك بارزانی دوپات كر، کو رێفراندۆم ده‌ربڕینا رایا گه‌له‌كێ سته‌ملێكری بوو، هه‌رچه‌نده روودانێن پشتی رێفراندۆمێ و دلپیسییا هند كه‌سان زیانێن مه‌زن گه‌هاندن كوردستانێ، لێ ب پشتراستی ڤه پاشه‌رۆژه‌كا گه‌ش و پێشكه‌فتی ل هیڤیا گه‌لێ كوردستانێ یه.
