مالكی هه‌لوه‌ستێ خوه لدۆر مه‌رجێن كوردان راگه‌هاند
سه‌رۆكێ ده‌وله‌تا قانوونێ، ئه‌ڤرۆ هه‌لوه‌ستێ خوه لدۆر مه‌رجێن هێزێن كوردستانی ژبۆ پشكداریێ د كوتله‌یا مه‌زن دا راگه‌هاند.
نووری مالیكی، سه‌رۆكێ ئێتێلافا ده‌وله‌تا قانوونێ، ئه‌ڤرۆ رۆژا چارشه‌مبێ راگه‌هاند؛ داخوازیێن هێزێن كوردستانی ژ بۆ پشكدارییا د كوتله‌یا مه‌زن دا نه ده‌ستووری نه و گۆت: پارێزگه‌ها كه‌ركووكێ یا هه‌موو ئیراقییانه.
ئێتێلافا ده‌وله‌تا قانوونێ و هه‌ڤپه‌یمانییا فه‌تح ب سه‌رۆكاتییا هادی عامری بزاڤێ د كه‌ن د گه‌ل لیستێن سه‌ركه‌فتی یێن كوردستانێ كوتله‌یا مه‌زن ژبۆ پێكئینانا حكومه‌تێ پێك بینن.
ل مه‌ها بۆری ژی شانده‌كێ هه‌ڤپشك یێ هه‌ڤپه‌یمانییا فه‌تح و ده‌وله‌تا قانوونێ سه‌را هه‌ولێر و سلێمانیێ دابوون و گۆتوبێژێن پێك ئینانا كوتله‌یا مه‌زن ده‌ستپێكربوون.
ل حه‌فتییا بۆری ژی هات راگه‌هاندن، پارتی و ئێكه‌تی، مه‌رجێن ئاسایكرنا ره‌وشا كه‌ركووكێ و چه‌ندین داخوازیێن دی وه‌ك مه‌رج ژبۆ پشكداریێ د كوتله‌یا مه‌زن دا، هه‌مبه‌ری هه‌ڤپه‌یمانییا فه‌تح و ده‌وله‌تا قانوونێ كرینه.
