میكانیزما هه‌لبژارتنا سه‌رۆكۆمارێ ئیراقێ ره‌ت دكه‌ین
فراكسیۆنا پارتی ل په‌رله‌مانێ ئیراقێ راگه‌هاندنه‌ك لدۆر هه‌لبژارتنا سه‌رۆكۆمارێ ئیراقێ به‌لاڤكر و تێدا دیاركر: میكانیزما هه‌لبژارتنا سه‌رۆكۆماری ره‌ت دكه‌ن.
د به‌یاننامه‌یه‌كێ دا فراكسیۆنا پارتی راگه‌هاند: ئه‌و دووپاتی ل هندێ دكه‌ن كو باوه‌ری ب میكانیزمێن دیمۆكراتیه‌ت و بنه‌مایێن ده‌ستووری هه‌یه، لێ ئه‌وا ل په‌رله‌مانێ ئیراقێ ل دۆر هه‌لبژارتنا سه‌رۆكۆمارێ ئیراقێ روودای، ب چو ره‌نگان دگه‌ل بنه‌مایێن رێكه‌فتنێ د ناڤبه‌را كوتله‌یێن سیاسی دا ناگونجیت.
تێدا هاتییه ژی: یاكو رێككه‌فتن ل سه‌ر هاتیه كرن هه‌می ئالیێن سیاسی یێن كوردستانی ل سه‌ر كاندیده‌كی بۆ سه‌رۆكاتییا كۆمارێ رێكبكه‌ڤن، یان ژی ب هه‌لبژارتنان د ناڤبه‌را كوتله‌یێن كوردستانێ بهێته ئێكلایكرن، لێ ئه‌و تشته قه‌ت روونه‌دا.
د به‌شه‌كێ دی یێ به‌یاننامه‌یێ دا هاتیه: ئه‌و میكانیزما سه‌رۆكۆمار پێ هاتیه هه‌لبژارتن ناهێته قه‌بولكرن و د داهاتییه‌كێ نێزیك دا دێ پارتی هه‌لوه‌سته‌كێ رۆهن هه‌بیت و ئه‌و ئالیێن رێكه‌فتن بنپێكری به‌رپرسیاریا وی كاری ب ستویێ خوه‌ڤه دگرن.
فراكسیۆنا پارتی ل په‌رله‌مانی دووپات ژی كر: ژ به‌ر ڤان ئه‌گه‌ران ڤه‌كێشانا كاندیدێ خوه ژ وێ پرۆسه‌یێ رادگه‌هینن.
