ئارمانجا 16ى ئۆكتۆبه‌رێ نه‌هێلانا كیانێ هه‌رێما كوردستانێ بوو
سه‌رۆك مه‌سعوود بارزانی په‌یامه‌ك د سالرۆژا خیانه‌تا 16ی ئۆكتوبه‌رێ دا به‌لاڤ كر و راگه‌هاند؛ شازده‌ی ئۆكتۆبه‌رێ خیانه‌تبوو ل هیڤی و ئومێدێن گه‌لێ كوردستانێ و ئارمانجا وێ نه‌هێلانا كیانێ هه‌رێما كوردستانێ بوو.
سه‌رۆك بارزانی دیار كر، به‌ری 16ی ئۆكتۆبه‌رێ وان پێشبینیا هه‌می ئه‌گه‌ران دكر، تنێ خه‌نجه‌را خیانه‌تێ نه‌بیت، لێ شازده‌ی ئۆكتۆبه‌را تاری، ده‌سته‌كێ ناڤخوه‌یی ب بێ وژدانی یاری ب چاره‌نڤیسێ گه‌لێ كوردستانێ كر و سفكاتی ب سه‌د سالێن خه‌باتا گه‌لێ مه كر و ئاخا ب خوینا هزاره‌ها شه‌هیدان رزگاربووی، ل 16ی ئۆكتۆبه‌رێ كه‌ڤته ژێر داگیركارییێ.
سه‌رۆك بارزانی دا زانین ژی: ئارمانجا 16ی ئۆكتۆبه‌رێ نه‌هێلانا كیانێ هه‌رێما كوردستانێ بوو، لێ پێشمه‌رگه‌ی پلانێن دوژمنان یێن ژناڤبرنا هه‌رێمێ كرنه خه‌ون، له‌و ئه‌ڤ رۆژه ژ بیردانكا چ كوردان ده‌رناكه‌ڤیت و دڤێت ببیته وانه بۆ هه‌ر كورده‌كی.
سه‌رۆك مه‌سعوود بارزانی هه‌موو ئالی ژی پشتراستكرن كو مساومه ل سه‌ر كوردستانیبوونا كه‌ركووكێ ناهێته كرن و دۆزا گه‌لێ كوردستانێ، دۆزه‌كا ره‌وایه و ب شه‌ڕ و پیلانان ب دوماهی ناهێت ، بۆ ڤێ یه‌كێ ژی بارزانی داخواز ژ گه‌لێ كوردستانێ كر، ب هێز و هیڤیێن مه‌زن ڤه چاڤه‌رێی پاشه‌رۆژێ بن.
سه‌رۆك بارزانی، په‌یامه‌ك ئاراسته‌یی دوژمنێن گه‌لێ كوردستانێ ژی كر و دیار كر، سیاسه‌تا شۆفێنی و ئینكاركرنێ، ژبلی شه‌ڕی چ ئه‌نجام نابن، له‌و پێدڤییه هه‌موو ئالی رێزێ ل دیرۆك و مافێن ره‌وا یێن گه‌لێ كوردستانێ بگرن.
