8 وه‌زیرێن مایی دێ ب رێككه‌فتن هێن ده‌ربازكرن
هه‌ڤپه‌یمانییا بینا رادگه‌هینیت؛ وه‌زیرێن مایی یێن حكومه‌تا ئیراقێ دێ ب رێككه‌فتنا ئالیێن سیاسی هێن ده‌رباز كرن.
هه‌ڤپه‌یمانییا بینا ئه‌ڤرۆ ل سه‌ر زارێ په‌رله‌مانتارا خوه ئینتیسار ئه‌ل مۆسه‌وی به‌حسا روونشتنا بهێت یا په‌رله‌مانێ ئیراقێ كر و راگه‌هاند؛ هه‌ر هه‌شت وه‌زیرێن مایی ئه‌وێن د روونشتنا داویێ یا په‌رله‌مانی دا هاتینه ره‌تكرن، دێ جاره‌كا دی كه‌ڤنه به‌ر ده‌نگدانێ.
دیار ژی كر، ئاراسته بۆ وێ یه‌كێ دچیت، هه‌مان ناڤێن هاتینه ره‌تكرن، جاره‌كا دی بكه‌ڤنه به‌ر ده‌نگدانێ، پشتی ئالیێن سیاسی رێككه‌فتنێ ل سه‌ر دكه‌ن.
ژ ئالیێ خوه‌ڤه، هه‌ڤپه‌یمانییا سائیروون هۆشداری داینه كو گه‌ر عادل عه‌بدولمه‌هدی، كه‌سێن سه‌ربخۆ نه‌دانیت، ئه‌و ب چ ئاوایه‌كی رێ ناده‌ن كه‌سێن حزبی وه‌زاره‌تێن مایی یێن حكومه‌تا ئیراقێ وه‌ربگرن.
په‌رله‌مانێ ئیراقێ د داوی روونشتنا خوه دا، ده‌نگ لسه‌ر چارده وه‌زیران دا، هه‌شت وه‌زیر ژی ماینه و بریاره د روونشتنا شه‌شی مه‌ها بهێت دا بكه‌ڤنه به‌ر ده‌نگدانێ.
