بارزانی دێ ل بەغدا و نەجەفێ ل گەل سەرکردەیێن ئیراقی کۆم بیت
سەرۆک مەسعوود بارزانی ئه‌ڤرۆ ل بەغدایێ دێ ل گەل بەرپرسێن ئیراقێ كۆمبیت و گرفتێن هه‌ولێر و به‌غدایێ و ئاساییكرنا ره‌وشا ده‌ڤه‌رێن كوردستانی، گۆتوبێژ كه‌ت.
هنارتیێ وار ل به‌غدا راگه‌هاند؛ سەرۆک مەسعوود بارزانی ئه‌ڤرۆ ل به‌غدایا پایته‌ختێ ئیراقی دێ ل گەل ھەر ئێک ژ عادل عەبدولمەھدی سەرۆکوەزیرێ ئیراقێ و محەمەد حەلبووسی سەرۆکێ پەرلەمانێ ئیراقێ، هه‌روه‌سا سه‌ركرده‌یێن ئالییێن سیاسی یێن شیعه و سووننه و فراكسیۆنێن كوردستانی کۆم ببیت و کێشەیێن ھەولێر و بەغدایێ، ئاساییکرنا رەوشا دەڤەرێن کوردستانێ ل گەل گۆتوبێژ بکەت.
ھەر د چارچووڤێ سەرەدانا خوە دا، بریارە سەرۆک بارزانی سەرەدانا پارێزگەھا نەجەف بکەت و ل گەل عەمار حەکیم، سەرۆکێ رەوتا حیکمە و موقتەدا سەدر، رابەرێ رەوتا سەدری و سەرۆکێ ھەڤپەیمانییا سائیروون و نووری مالکی سەرۆکێ ھەڤپەیمانییا دەولەتا قانوونێ کۆم ببیت.
داوی جار سەرۆک بارزانی ل سالا دو ھزار و شازدێ سەرا بەغدایێ دابوو، لێ پشتی خیانەتا شازدەی ئۆکتۆبەرێ و لەشکەرکێشییا سوپایێ ئیراقێ و حەشدا شەعبی بۆ سەر کەرکووکێ و دەڤەرێن دەرڤەیی ئیدارەیا ھەرێما کوردستانێ ، پەیوەندیێن ھەرێم و بەغدایێ بەر ب رەوشەکا ئالۆز چووبوون.
