فرەنسا دوپاتی ل پشتەڤانییا خوە یا گشتگیر بۆ هەرێما کوردستانێ کر
شاندەکا بلند یا فرەنسا د ھەڤدیتنا ل گەل سەرۆکوەزیرێ ھەرێما کوردستانێ دا، دوپاتی ل پشتەڤانییا وەلاتێ خوە یا گشتگیر بۆ هەرێمێ کر.
نێچیرڤان بارزانی، سەرۆکوەزیرێ ھەرێما کوردستانێ ئەڤرۆ پێشوازی ل شاندەکا بلند یا فرەنسا، ب سەرۆکاتییا ماربێل دو سانێز، سەرۆکا لژنەیا پەیوەندیێن دەرڤە یا پەرلەمانێ فرەنسا و بالیۆز و کۆنسۆلێن وی وەلاتی ل ئیراقێ و ھەرێما کوردستانێ کر.
د ھەڤدیتنا هەردو ئالییان دا شاندا فرەنسی پشتەڤانیا وەلاتێ خوە بۆ ھەرێما کوردستانێ راگەهاند و رۆلێ خەلکێ کوردستانێ و پێشمەرگەی ل ھەمبەر گەفێن تیرۆرستان و وەرگرتنا ئاوارە و پەنابەران، ھەروەسا پێنگاڤێن حکومەتا ھەرێمێ یێن چارەکرنا کێشەیێن ھەولێر و بەغدا ب رێیا دانوستاندنان و ئێکرێزییا ئالیێن کوردستانی بلند نرخاندن.
ژ ئالیێ خوە ڤە نێچیرڤان بارزانی سوپاسییا فرەنسا کر، کو ل رەوشێن خراب ھاریکارییا ھەرێما کوردستانێ کری، ھەروەسا باس ل پرۆسەیا سیاسی یا ئیراقێ و ھەرێما کوردستانێ و پێکئینانا ھەردو حکومەتێن ھەولێر و بەغدایێ کر و پشتەڤانییا خوە بۆ کابینەیا عەبدولمەھدی نیشان دا.
