سەرۆکوەزیرێ ھەرێمێ و وەزیرێ وزەیا ئەمریکا کۆم بوون
د ھەڤدیتنا خوە دا ل گەل سەرۆکوەزیرێ ھەرێما کوردستانێ، وەزیرێ وزەیا ئەمریکا پشتەڤانییا وەلاتێ خوە بۆ چارەرکرنا کێشەیێن دناڤبەرا ھەولێر و بەغدایێ دا دیارکر.
نێچیرڤان بارزانی سەرۆکوەزیرێ ھەرێمێ پێشوازی ل ریک پێرى وەزیرێ وزەیا ئەمریکا و شاندەکا ل گەل کر، شاندا ئەمریکا پشتەڤانییا خوە بۆ جێگیربوونا سەقامگیریێ ل ئیراقێ و ھەرێما کوردستانێ و گۆتووبێژێن ھەولێر و بەغدایێ نیشاندا، ھەروەسا قۆربانیێن ھەرێما کوردستانێ ل شەرێ دژی داعشێ بلند نرخاند.
ژ ئالیێ خوەڤە سەرۆکوەزیرێ ھەرێمێ دوپات کر، کو ھەرێما کوردستانێ سەرەدانا وەزیرێ وزەیا ئەمریکا وەک پشتەڤانییەکا بھێز بۆ خەلک و حکومەتا ھەرێما کوردستانێ تەماشە دکەت.
نێچیرڤان بارزانی، سوپاسییا رۆلێ ئەمریکا ژبۆ لێک نێزیککرنا ھەولێر و بەغدایێ و بەرھەڤییا ھەرێمێ ژی بۆ چارەکرنا کێشەیان نیشان دا، داخواز کر ئەمریکا رۆلێ خوە د وی واری دا بگێریت ب تایبەت ل سەر ھنارتنا پەترۆلا کەرکووکێ، کو ھەر ل دەستپێکێ حکومەتا ھەرێمێ ئاسانکاری نیشاندایە، کو رێژەیا نھا یا ھنارتنا وێ بۆ بەرژەوەندی و داھاتێ گشتی یا ئیراقێ بھێت بکارئینان.
