ئەمریکا: ئیران بزاڤا چێکرنا ئمبراتۆریەتا فارسی دکەت

کۆنگرێسێ ئەمریکا د راپۆرتەکێ دا ئاشکرا کر، ھەستا مەزناھیێ، ئیرانی کۆنترۆل کرینە بۆ دوبارەکرنا ئاڤاکرنا ئمبراتۆریەتا فارسی، ژبەر وێ یەکێ ژی پشتەڤانیێ ل پێنج کیانان دکەن دا کۆنترۆلا خوە ل سەر دەڤەرێ ڤەگەرینیت.
راپۆرتا کۆنگرێسێ ئەمریکا ئاشکرا کر، تەھران بزاڤان دکەت بەندێن رێککەفتنا ئەتۆمی بۆ خوە ب دەلیڤە ببینیت و خو وەکو بنگەھەکێ ھەرێمی ، یێ وزێ و بازرگانی و دانوستاندنێن کڕینا چەکی ل پاشەرۆژێ بدەتە نیاسین.
ل گۆرەی راپۆرتا کۆنگرێسی، 5 گرۆپ پارەی ژ ئیرانێ وەردگرن ئەو ژی، حکومەتێن ھەڤپەیمان و گرۆپێن چەکدارن یێن وەکو رژێما ئەسەدی ل سووریێ، حزبوللاھا لوبنانی، میلیشیایێن حۆسی ل یەمەنێ، میلیشیایێن شیعە ل ئیراقێ و گرۆپێن چەکدار ل بەحرەینێ نە.
کۆنگرێسی ئاشکرا ژی کر، پشتەڤانییا ئیرانێ، نە ب تنێ ژ روویێ سەربازییە بۆ گرۆپێن ھەڤپەیمانێن وێ، بەلکو پشتەڤانییا دارایی ژی ل ھندەک بەربژارێن سیاسی د ھەلبژارتنێن ئیراقێ و ئەفغانستانێ دا کریە.