پارتی دێ گۆتوبێژێن پێكئینانا حكومه‌تێ ده‌ستپێكه‌ته‌ڤه
پارتی دیمۆكراتی كوردستان ب نیازه گۆتوبێژێن پێكئینانا كابینه‌یا نه‌هێ یا حكومه‌تا هه‌رێمێ ده‌ست پێ بكه‌ته‌ڤه و ئێكه‌م جار دێ دگه‌ل كۆمه‌لا ئیسلامی كۆمبیت.
ل گۆری زانیاریێن وار، شاندا پارتی دیمۆكراتی كوردستان ل ڤێ حه‌فتیێ دێ سه‌را كۆمه‌لا ئیسلامی ده‌ت و ب ئارمانجا ده‌ستپێكرنا گۆتوبێژێن پێكئینانا حكومه‌تێ، د دووڤ دا، شاندا پارتی دێ ل سلێمانییێ دگه‌ل هه‌ر یه‌ك ژ ئێكه‌تییا نیشتیمانی و ته‌ڤگه‌را گۆرانێ كۆم بیت.
كۆمه‌لا ئیسلامی چه‌ندین كۆمبوون ژبۆ ئێكلاكرنا پشكدارییا خوه د حكومه‌تێ دا كرینه، لێ هێشتا چ بریاره‌ك نه‌دایه و ل ژڤانا كۆمبوونا دگه‌ل شاندا پارتی یه.
پارتی د ئێكه‌م گه‌را گۆتوبێژان دا، ل سلێمانیێ دگه‌ل ئێكه‌تی و گۆرانێ كۆمبوو و ئه‌و كۆمبوون ب راوێژكاری دهاتن هه‌ژمارتن، چاڤه‌رێ ژی دهێت كرن، د قۆماغا بهێت دا، كۆمبوونێن ئێكلاكه‌ر بهێن كرن.
