بارزانی: سه‌رۆكاتییا ژنێ ل په‌ڕله‌مانى پێشڤه‌چوونا سیاسى یه
سه‌رۆک بارزانی ل گه‌ل جێگرێ سه‌رۆکێ حکومه‌تا به‌لجیکا و شانده‌کا ئێکه‌تییا ئه‌ورۆپا کۆم بوو و راگه‌هاند؛ سه‌رۆكاتییا ژنێ ل په‌ڕله‌مانێ كوردستانێ، پێشڤه‌چوونا كه‌لتوورێ سیاسى یه.
ل گۆره‌ى مالپه‌رێ سه‌رۆك بارزانى ئاله‌کسانده‌ر دێ کرۆ، جێگرێ سه‌رۆکێ حکومه‌تا به‌لجیکا، كو شڤێدی ب سه‌رۆكاتییا شانده‌کا ئێکه‌تییا ئه‌ورۆپا گه‌هشتیه‌هه‌رێما كوردستانێ، ئه‌ڤرۆ ئێڤارى ل پیرمامێ، ل گه‌ل سه‌رۆك مه‌سعوود بارزانى كۆم بوو و ژبۆ هه‌لبژارتنا ده‌سته‌یا سه‌رۆكاتییا په‌رله‌مانێ كوردستانێ، پیرۆزباهى ل سه‌رۆك بارزانى كر و ب گاڤه‌كا ئه‌رێنى بۆ پێشڤه‌چوونا پرۆسه‌یا سیاسى یا هه‌رێمێ ناڤ كر.
سه‌رۆک بارزانی ژی هه‌لبژارتنا ژنه‌کێ بۆ پۆستێ سه‌رۆکاتییا په‌رله‌مانێ کوردستانێ ب نیشانا پێشڤه‌چوونا که‌لتوورێ سیاسی یێ کوردستانێ و گه‌لێ وێ ناڤ کر و دوپات کر: فه‌رهه‌نگا گه‌لێ کورد رێ ناده‌ت، توندوتیژی و تیرۆرێ پێگه‌هێ خوه ل کوردستانێ هه‌بیت.
ده‌رباره‌ی سووریێ و رۆژاڤایێ کوردستانێ ژی، سه‌رۆک بارزانی دلگرانیا خوه ژ ره‌وشا نها و ئاماژه‌یێن پاشه‌رۆژا کوردان ل سوریێ دیار کر و خواست، رێ نه‌هێته دان زێده‌تر زیان ب کوردان ل وی وه‌لاتی بکه‌ڤیت.
شاندا ئه‌ورۆپی ژی سوپاسییا هه‌ڤکارییا هه‌رێما کوردستانێ د رووبرووبوونا تیرۆرێ دا کر و دوپات کر: ئێکه‌تییا ئه‌ورۆپا دێ هه‌ر مینیت هه‌ڤپشکا کوردستانێ.
