ترامپ: ژ ئیراقێ ناهێینە ڤەکێشان
سەرۆکێ ئەمریکا جارەکا دی رەخنە ل مەزاختنا پارەی ل رۆژهەلاتا ناڤین کرن و راگەهاند، ب ترلیۆنان دۆلار ب هەروە چووینە، لەورا هێزێن ئەمریکی ژ ئیراقێ ناهێنە ڤەکێشان.
دۆنالد تڕامپ ل واشنتۆن پشکداری کۆنگرەیێ هەلمەتا سیاسی یا پارێزگاران بوو، ئیراق وەک نمۆنەیا وەلاتێن نەئارام ئینا و دوبارە بەحسێ سەرەدانا خوە یا ئیراقێ کر و راگەهاند، ئەمریکا د بیست سالێن بووری دا پتری حەفت ترلیۆن دۆلاران ل رۆژهەلاتا ناڤین مەزاختینە، لێ دەمێ وی خواستی سەرەدانا ئیراقێ بکەت، ب نەچاری داکۆ پاراستی بن، رۆناهیێن فرۆکەیا وی هاتنە ڤەمراندن.
ترامپی هەروەسا بەحسێ بنگەهێ سەربازی یێ عەین ئەسەد کر و دیار کر، ئەمریکا سێ ملیار دۆلار ل ئاڤاکرنا بنگەهێ سەربازی یێ عەین ئەسەد ل ئیراقێ مەزاختینە، لەورا هێزێن ئەمریکی ژ وی بنگەهی ناهێنە ڤەکێشان.
ترامپ ل مەها کانوونا ئێکێ یا پار د سەرەدانەکا نەچاڤەڕێکری دا چووبوو ئیراقێ و ژ وی دەمی، ژمارەکا بەرپرس و سیاسەتمەدارێن ئیراقی داخوازا دەرخستنا هێزێن ئەمریکی دکەن.
