روونشتنا پەرلەمانێ کوردستانێ هات پاشخستن
روونشتنا پەرلەمانێ کوردستانێ ل دۆر پەسەندکرنا پرۆژەقانوونا سەرۆکاتییا ھەرێمێ، ژبه‌ر رێكنه‌كه‌فتنا ئالییان هات پاشخستن.
په‌یامنێری وار ل هه‌ولێرێ راگه‌هاند؛ بریاربوو ئەڤرۆ سعه‌ت دویێ پشتی نیڤرۆ، په‌رله‌مانێ كوردستانێ كۆم ببیت و پرۆژەقانوونا كاراكرنا سەرۆکاتییا ھەرێمێ په‌سه‌ندبكه‌ت، لێ ژ به‌ر رێكنه‌كه‌فتنا پارتی و ئێكه‌تی و گۆڕانێ ل دۆر زێده‌كرنا جێگرێ دویێ بۆ سه‌رۆكێ په‌رله‌مانی، روونشتن هات پاشخستن.
گۆت ژی: روونشتن ل سه‌ر پێشنیازا لیژنه‌یا قانوونی یا په‌رله‌مانی بۆ ده‌مه‌كێ نه‌دیار هاتییه پاشخستن و تا رێككه‌فتنا ئالییان، په‌رله‌مان كۆم نابیت.
پرۆژەقانوونا راستڤەکرییا سەرۆکاتییا ھەرێما کوردستانێ ژ ھەشت ماددەیان پێکدھێت، به‌رییا نها خواندنا ئێكێ و دویێ بۆ هاتیه‌كرن، لێ زێده‌كرنا جێگرێ دویێ بۆ سه‌رۆكێ هه‌رێمێ، كێشه خستییه هه‌مبه‌ر ده‌ربازكرنا وی پرۆژه‌ی.
