شانده‌كێ لقێ8 سه‌ره‌دانا ده‌زگایێ ده‌لال كرن

محه‌مه‌دسدیق
شانده‌كێ لقێ هه‌شت یا پارتى دیموكراتى كوردستان، ب سه‌رپه‌رشتیا دكتور عه‌لى ته‌ته‌ر ئه‌ندامێ جڤاتا سه‌ركردایه‌تیێ و به‌رپرسێ لقێ، سه‌ره‌دانا ده‌زگایێ ده‌لال یێ ره‌وه‌شنبیرى و راگه‌هاندنێ كر و ژلایێ ئازاد جه‌هوه‌ر به‌رپرسێ ده‌زگایێ و كارمه‌ندێن وێ ڤه‌ هاتنه‌ پێشوازیكرن، د روینشتنه‌كێ دا دكتور عه‌لى ته‌ته‌ر بورینا سێزده‌ سالان ب سه‌ر دامه‌زراندنا ته‌له‌فزیونا ده‌لال و هه‌روه‌سا بورینا سه‌د و بیست و ئێك سالان ب سه‌ر بیره‌وه‌ریا روژنامه‌گه‌ریا كوردى دا پیروزباهیێن خوه‌ ئاراسته‌ى به‌رپرس و كارمه‌ندێن ده‌زگایێ ده‌لال یێ ره‌وه‌شنبیرى و راگه‌هاندنێ كرن، به‌رپرسێ لقێ هه‌شت دا زانین، د ئه‌ڤروكه‌دا راگه‌هاندنێ روله‌كى كارا و ئه‌كتیڤ هه‌یه‌ د پیشخستن و وه‌رارا هه‌مى جڤاكاندا و پره‌كه‌ ژى بو گه‌هاندنا گلله‌ و ئاریشێن خه‌لكێ ب ده‌ستهه‌لاتێ، ژبه‌ر هندێ كارێ روژنامه‌ڤان دكه‌ن پێدڤییه‌ په‌یاما راستیێ و وه‌فایێ بیت به‌رامبه‌ر ملله‌تێ وى و ئه‌گه‌ره‌ك بیت بو ئاڤاكرنێ نه‌ك خرابكرنێ، به‌رپرسێ لقێ هه‌شت، ل داویێ ژى ده‌ستخوه‌شى ل سه‌رجه‌م كارمه‌ندێن ده‌زگایێ ده‌لال كر كو به‌رده‌وام و بێ وه‌ستیان خزمه‌تا پارتا خوه‌ و خه‌لكێ خوه‌ دكه‌ن و ب نیشانا دلسوزى و وه‌فاداریا وان ل قه‌له‌م دا، هه‌روه‌سا پشته‌ڤانیا خوه‌ ژى بو هه‌ر كاره‌كێ پێدڤى و دشیاندا نیشاندا