نێچیرڤان بارزانى: هه‌رێم پێگیرى چاره‌كرنا هه‌موو كێشه‌یانە ل گۆرەى ده‌ستوورى
ب پشكدارییا به‌رپرسێن بلند یێن حكومه‌تێن هه‌رێم و ئیراقێ، گۆپیتكا ئابوورى یا هه‌ولێر و به‌غدایێ ل هه‌ولێرێ هاته کرن و سه‌رۆکوه‌زیر بارزانى راگه‌هاند؛ هه‌رێم پێگیرى چاره‌كرنا هه‌موو كێشه‌یاینه‌ل گۆره‌ى ده‌ستوورى.
شانده‌كا بلند یا حكومه‌تا ئیراقێ ب سه‌رۆكاتییا دكتور فواد حسێن، وه‌زیرێ دارایى و پشكدارییا 20 وه‌زیر و رێڤه‌به‌رێن گشتى یێن حكومه‌تا ئیراقێ ل هه‌ولێرێ یه و ئه‌ڤرۆ ب ئاماده‌بوونا نێچیرڤان بارزانى، سه‌رۆكێ حكومه‌تا هه‌رێمێ و مه‌سروور بارزانى، راوێژکارێ جڤاتا ئاساییشا هه‌رێمێ و پترییا وه‌زیر و رێڤه‌به‌رێن گشتى یێن حكومه‌تێ، پشکداری گۆپیتكا ئابوورى یا هه‌رێم و به‌غدایێ بوون.
نێچیرڤان بارزانى ل ده‌ستپێكا گۆپیتكێ راگه‌هاند؛ د شیان دا یه هه‌موو كێشه‌یێن هه‌لاویستى یێن د ناڤبه‌را هه‌ولێر و به‌غدا و هه‌روه‌سا كێشه‌یا ده‌ڤه‌رێن كوردستانی ل گۆره‌ى ده‌ستوورى بهێت چاره‌كرن و كۆمبوونا ئه‌ڤرۆ ژى، گاڤه‌كا گرنگه بۆ هه‌ڤکاریێ و پێكڤه‌چاره‌كرنا هه‌موو كێشه‌یان.
گۆپیتكا ئه‌ڤرۆ بۆ پێشخستنا په‌یوه‌ندیێن هه‌رێم و به‌غدایێ بوو و بزاڤه‌کا ده‌ستپێكی بوو، بۆ چاره‌كرنا ئێكجارى یا هه‌موو كێشه‌یێن د ناڤبه‌را هه‌رێم و ئیراقێ دا و بابه‌تێن مووچه و په‌ترۆلا هه‌رێمێ و ده‌ریێن سنۆرى و پاره‌یێ جوتیاران تێدا هاتنه گۆتوبێژكرن.
