سوبه دێ سه‌رۆكێ هه‌رێما كوردستانێ هێت هه‌لبژارتن
سه‌رۆكاتییا په‌رله‌مانێ كوردستانێ بریار دا، سوبه رۆژا سێشه‌مبێ په‌رله‌مان كۆم ببیت و سه‌رۆكێ هه‌رێما كوردستانێ هه‌لبژێریت.
د راگه‌هاندنه‌كێ دا سه‌رۆكاتییا په‌رله‌مانێ كوردستانێ بریار دا سوبه رۆژا سێشه‌مبێ روونشتنا ئاسایی یا هه‌ژمار شه‌ش ژ خولا پێنجێ گرێده‌ت و تێدا، سه‌رۆكێ هه‌رێما كوردستانێ هه‌لبژێریت.
سه‌رۆكاتییا په‌رله‌مانی داخواز ژ هه‌موو په‌رله‌مانتاران كرییه به‌رهه‌ڤی روونشتنێ ببن و كارنامه‌یا روونشتنێ ژی به‌لاڤكرییه كو دێ تایبه‌ت بیت ب هه‌لبژارتنا سه‌رۆكێ هه‌رێما كوردستانێ.
چاڤه‌رێ دهێت كرن، نێچیرڤان بارزانی، وه‌ك به‌ربژارێ پارتی ب رێككه‌فتنا سیاسی و پشته‌ڤانییا پترییا فراكسیۆنێن په‌ڕله‌مانی، وه‌ك سه‌رۆكێ هه‌رێما كوردستانێ بهێت هه‌لبژارتن.
پێشتر سه‌رۆكاتییا په‌ڕله‌مانێ كوردستانێ ناڤێن وان كه‌سان راگه‌‌هاندینه، كو مه‌‌رجێن قانوونی یێن وه‌رگرتنا پۆستێ سه‌رۆكێ هه‌رێما كوردستانێ تێدانه و ل گۆری وێ، هه‌‌ر یه‌‌ك ژ نێچیرڤان بارزانی، ئومێد عه‌بدولسه‌لام، محه‌مه‌د حه‌مه سالح، رێبوار عه‌زیز مسته‌فا و هیوا عه‌بدوللا خدر، به‌ربژارێن سه‌رۆكاتییێ نه.
