مه‌سروور بارزانی و جێگرێ وه‌زیرێ ده‌رڤه یێ ئه‌مریكا كۆم بوون
سه‌رۆكوه‌زیرێ راسپاردی یێ حكومه‌تا هه‌رێما كوردستانێ ئه‌ڤرۆ دگه‌ل جێگرێ وه‌زیرێ ده‌رڤه‌یێ ئه‌مریكا بۆ كارێن ئیراقێ و ئیرانێ كۆمبوو و پێشدابرنا په‌یوه‌ندییان گۆتوبێژ كر.
مه‌سروور بارزانی ئه‌ڤرۆ پێشوازی ل ئاندرۆ پیك كر و د كۆمبوونێ دا كو بالیۆزێ ئه‌مریكا ل ئیراقێ، كونسلێ ئه‌مریكا ل هه‌ولێرێ و نوونه‌را حكومه‌تا هه‌رێمێ ل ئه‌مریكا د ئاماده‌بوون، پێشهاتێن ده‌ڤه‌رێ ب گشتی هه‌روه‌ها په‌یوه‌ندیێن هه‌رێما كوردستانێ و ئه‌مریكا د گشت واره‌كی دا گۆتوبێژ ل سه‌ر هاتن كرن.
مه‌سروور بارزانی به‌حسا بزاڤێن پێكینانا كابینه‌یا حكومه‌تێ كر و راگه‌هاند؛ كابینه دێ ل ده‌ما خوه ئاراسته‌ی په‌رله‌مانی بیت، داكو باوه‌ری پێ بهێت دان، لدۆر پرۆسه‌یا سیاسی یا ئیراقێ ژی، دوپاتی ل چاره‌كرنا كێشه‌یێن هه‌ولێر و به‌غدایێ ل گۆری ده‌ستووری كر.
جێگرێ وه‌زیرێ ده‌رڤه‌یێ ئه‌مریكا بۆ كارێن ئیراق و ئیرانێ، هیڤییا سه‌ركه‌فتنێ بۆ مه‌سروور بارزانی د ئه‌ركێ نوو دا خواست، به‌رهه‌ڤییا ئه‌مریكا ژی بۆ پێشدابرنا په‌یوه‌ندیێن دگه‌ل هه‌رێما كوردستانێ دیاركر.
