پارتی و ئێكه‌تی ل سه‌ر پارێزگه‌رێ كه‌ركووكێ رێككه‌فتن
پارتی دیمۆكراتی كوردستان و ئێكه‌تییا نیشتیمانی رێككه‌فتنا دوماهیێ ل سه‌ر پارێزگه‌رێ كه‌ركووكێ كرن و بریاره ئێكه‌تی به‌ربژارێن خوه بۆ پۆستێن وه‌زاری ئاراسته‌ی سه‌رۆكوه‌زیرێ راسپاردی بكه‌ت.
به‌شدار حسێن په‌یامنێرێ وار ل هه‌ولێرێ دیاركر، ئێكه‌تییا نیشتیمانی به‌ربژاره‌ك بۆ پۆستێ پارێزگه‌رێ كه‌ركووكێ ئاراسته كرییه و پارتی ژی ل سه‌ر رازیبوویه، ل ده‌مێن بهێن ژی دێ ئه‌و رێككه‌فتن دگه‌ل ناڤێ به‌ربژارێ پارێزگه‌رێ كه‌ركووكێ هێته راگه‌هاندن.
دا زانین ژی، ب رێككه‌فتنا پارتی و ئێكه‌تیێ، ئێدی چ به‌ربه‌سته‌ك ل همبه‌ر پێكئینانا كابینه‌یا نه‌هێ یا حكومه‌تا هه‌رێمێ نه‌مایه و بریاره ئێكه‌تی به‌ربژارێن خوه بۆ پۆستێن وه‌زاری ئاراسته‌ی مه‌سروور بارزانی بكه‌ت.
په‌رله‌مانێ كوردستانێ د روونشتنا خوه یا داویێ دا، بێهڤه‌دانا خوه یا هاڤینێ هه‌لوه‌شاند بۆ وێ چه‌ندێ د ده‌مێ قانوونی دا ده‌نگی ل سه‌ر كابینه‌یا نه‌هێ بده‌ت.
نێچیرڤان بارزانی سه‌رۆكێ هه‌رێما كوردستانێ ل دوازده‌ی مه‌ها بۆری، مه‌سروور بارزانی بۆ پێكئینانا حكومه‌تێ راسپارد، ب وێ چه‌ندێ تنێ نه‌هـ رۆژ ماینه ده‌مێ قانوونی ب داوی بهێت، په‌یامنێرێ وار ژی دا زانین، ئێكه‌تی به‌ری دوازده‌ی تیرمه‌هێ دێ ناڤێن به‌ربژارێن خوه ئاراسته‌ی سه‌رۆكوه‌زیرێ راسپاردی كه‌ت.
