په‌ڕله‌مانێ كوردستانێ خواندنا ئێكێ بۆ 2 پرۆژه‌یان كر
په‌رله‌مانێ كوردستانێ ئه‌ڤرۆ كۆم بوو و خواندنا ئێكێ یا 2 پرۆژه‌قانوونان كر و بریاره سوبه خواندنا دویێ ژى بۆ هه‌مان پرۆژه‌یان بكه‌ت.
ئه‌ڤرۆ سعه‌ت 11ى سپێدێ، په‌رله‌مانێ كوردستانێ كۆم بوو و ل ده‌ستپێكا كۆمبوونێ دكتوره ڤالا فه‌رید، سه‌رۆكا په‌رله‌مانێ كوردستانێ بۆمبه‌بارانێن به‌رده‌وام یێن سوپایێ توركیا ل ده‌ڤه‌رێن سنۆرى یێن هه‌رێمێ شه‌رمزار كر و داخواز ژ حكومه‌تا ئیراقێ كر، ل گۆره‌ى ده‌ستوورى سنۆرێن خوه ب پارێزیت، پاشان ده‌ست ب بجهئینانا كارنامه‌یا روونشتنێ كر.
ل ده‌ستپێكێ ب ده‌نگێن 5ى په‌رله‌مانتاران، خواندنا ئێكێ بۆ پرۆژه‌قانوونا مرۆڤسازییێ ل هه‌رێمێ ژبۆ پشتى پێكئینانا حكومه‌تێ هات پاشخستن، هه‌روه‌ها خواندنا ئێكێ ژبۆ هه‌ردو پرۆژه‌یێن تاپۆكرنا زه‌ڤى و خانییێن زێده‌گاڤى و راستڤه‌كرنا پرۆژه‌یێ جڤاتێن پارێزگه‌هێن هه‌رێمێ هاته‌كرن.
ل دوماهییا روونشتنێ ژى، سه‌رۆكا په‌ڕله‌مانى بریاردا روونشتن سوبه ژى به‌رده‌وامبیت و تێدا، گۆتوبێژا راپۆرتێن لژنه‌یان ل دۆر هه‌ردو پرۆژه‌یێن تاپۆكرنا زه‌ڤى و خانییێن زێده‌گاڤى و جڤاتێن پارێزگه‌هێن هه‌رێمێ بهێت كرن.
